Елбасымен кездесу бейресми сипатта болғандығы қуантты. Президент біздің ортамызға галстуксіз келіп, екі сағат бойы ортақ мәселелерді шынайы түрде талқыладық. Мемлекет басшысын тек Президент ретінде ғана емес, сондай-ақ біздің жанашырымыз, елдің үлкен ағасы ретінде танып білдік.
Өйткені Елбасының жанашыр сөздері, әкелік ақыл-кеңестері жастардың материалдық жағдайын көтеруге ғана байланысты емес, жеке өміріне қатысты өте үлкен мәселелердің түйінін тарқатып берді. Менің өзім халқымыздың дәстүріндегі ел ағасының жастарды жинап, бағыт-бағдарын көрсетіп, ақыл-кеңесін беретін жиынға қатысып келгендей әсерде отырмын.
Әсіресе Елбасының жастарды тұрғын үймен қамтамасыз етуге байланысты ұсыныстарына ризамын. Енді әрбір қалада жыл сайын жастар үшін 1000 жалдамалы пәтер салынуы – жастардың көкейіндегі мәселеге дөп түскендік.
Мемлекет басшысының жастар арасындағы жұмыссыздықты шешу жолдарына байланысты ұсынысын, жоғары оқу орындары мен жастардың жауапкершілігін арттыруға байланысты пікірлерін де толық қолдаймын.
Ақерке ЖҰМАНБАЙ,
«Астана» телеарнасының музыкалық продюсері