Батыс Қазақстан облысында өткен жылдың соңында құрылған «Ақжайық – адалдық алаңы» жобалық кеңес аясындағы сарапшылық топтың құрамына тілшілер шақырылып жатыр. Бұл жөнінде жоба жетекшісі Орынбек Нәсимуллин хабарлады.
«Ақжайық – адалдық алаңы» жобасына өткен жылы 30 қарашада қол қойылған. Орал қаласына келген Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігі төрағасы А.Шпекбаев пен Батыс Қазақстан облысы әкімі А.Көлгінов қол қойған бұл құжат Қазақстан Президентінің 2018 жылғы халыққа Жолдауынан кейін дүниеге келген «Жемқорлықтан ада өңірлер» жобасы бойынша жүзеге асқан болатын.
19 желтоқсанда Батыс Қазақстан облысы әкімдігі ғимаратында «Ақжайық – адалдық алаңы» жобасының офисі ашылған.
– «Ақжайық – адалдық алаңы» жобасының мақсаты – Батыс Қазақстан облысында азаматтардың мемлекеттік билік институттарына сенімін арттыру, жемқорлық деңгейін төмендету және сыбайлас жемқорлықты қабылдамаудың қоғамдық ахуалын қалыптастыру, – дейді жоба жетекшісі Орынбек Нәсимуллин.
Жоба тұрмыстық сыбайлас жемқорлықты жою, қоғамдық бақылауды жүзеге асыру, сыбайлас жемқорлыққа қарсы мәдениетті қалыптастыру бағытында жұмыс істемек.
– Тіпті жол жөндеу жұмыстары кезінде тиісті жол белгілерін дер кезінде орнатпаудың өзі сыбайлас жемқорлық қаупін тудырады. Бұл жерде мемлекеттік мекеме мен полицияның мүддесі болуы мүмкін. Өйткені жол белгісі талабын бұзғаны үшін салынатын айыппұл жергілікті бюджетке түседі. Немесе пара түрінде полиция қызметкерінің қалтасында кетеді, – дейді Орынбек Жамбылұлы.
«Күнделікті тұрмыста кездесетін жемқорлықты жою – еліміздің әр азаматының міндеті» дейді «Ақжайық – адалдық алаңы» жобасының жетекшісі. Болашақта жобалық кеңес аясындағы сарапшылық топтың құрамына жергілікті БАҚ қызметкерлері шақырылмақ.
Қазбек ҚҰТТЫМҰРАТҰЛЫ,
«Egemen Qazaqstan»
Батыс Қазақстан облысы