Назарбаев зияткерлік мектептерінде 2012-2013 оқу жылынан бастап оқушылардың «Уикипедия» клубы жұмыс істеп келеді. Содан бері қазақша электронды энциклопедия қоры жас қаламгерлер жазған 20 мыңнан астАам мақаламен толығыпты.
Жақында осы арнаулы мектептер аясында Wiki Camp акциясы өткен еді. Бұл шараға Талдықорған қаласындағы физика-математика бағытындағы Назарбаев зияткерлік мектебінің жүзге жуық оқушысы да қатысты. Дәстүрлі акция биылғы Жастар жылына орай «Жастар – еліміздің мақтанышы» деген ұранмен ұйымдастырылды.
«Уикипедия» клубы Талдықорғандағы Назарбаев зияткерлік мектебінде де 2013 жылы құрылды. Осы уақыт ішінде оқушылар қазақ, ағылшын, орыс тілдерінде мақала жазып, оны онлайн-энциклопедияға өз бетінше жолдап, толықтыруды меңгерген екен. Бүгінге дейін «Уикипедия» клубының мүшелері Жетісу өңіріндегі тарихи-мәдени мұра туралы, ғылыми жаңалықтар мен еліміздің қазіргі заманғы жетістіктері туралы 3 мыңға жуық мақала жазып, сайтқа орналастырыпты.
Айтпақшы, осы мектептегі «Уикипедия» клубының алғашқы президенті болған оқушы, бүгінде студент атанған Құдайберген Дәулеткерей Гонконгта және Лондонда өткен «Wikimania-2013», «Wikimania-2014» халықаралық конференцияларына қатысып, қазақ балаларының жазба жұмысын әлем назарына таныстырды.
– «Уикипедия» клубы мектеп оқушыларын мақала жазуға және редакциялауға дағдыландырады, дейді Талдықорғандағы Назарбаев зияткерлік мектебі жанындағы «Уикипедия» клубының үйлестірушісі Нәзира Сұлтанова.
Қалмаханбет МҰҚАМЕТҚАЛИ,
«Egemen Qazaqstan»
Алматы облысы