Сары «Москвич»

Жас Суретшілер одағы жасап шық­­­қан айрықша арт-нысан көне ша­һардың өткені мен бүгінін сабақ­тас­тырып тұрғандай әсерге қал­дырады. Туындыгерлердің бұл идеясына Шәкен Аймановтың 1957 жылы жарық көрген «Біздің сүйікті дәрігер» фильміндегі сары «Москвич» арқау болыпты. 

«Газдар»-«Маздар», 

«Москвичтер», «Волгалар», 

Зула-зула, зула темір жорғалар» – деп бір кездері Мұқағали өлеңге қосқан мұндай көліктерді ілуде біреу болмаса, қазір қала көшелерінен кездестіре бермейсіз. Ал көлік кабинасына лық толтырылған жасанды жеміс Алма­тының әсем апортын еске салардай. Шаһардың әзелгі тұрғындары ол кез­дері қазіргідей ағылып жатқан кө­лік жоқ еді, осындай көліктер мен таңнан кешке дейін тыным таппайтын трамвайлар көшелердің сәні болатын деп еске алады. Заман ағысына сай трамвайлар да көзден таса болып, оның орнын жерасты метролары мен жүрдек автобустар басқалы қашан. Тұрғындар бұл өнер туынды­сын көзден кетсе де көңілден кетпейтін сырлы сәттерге, жастық меке­нінің жанға жайлы шақтарына сапар шектіретін әсерлі естелік деп есептейді.

Өткеннен нәр алмай ертеңіңді елестету мүмкін емес. Осыны ескерген мың бояулы мегаполис ежелгі Ал­ма мәдениетін өзіне қайтарғысы келетіндей. Былтыр шаһарда тұңғыш рет Алма музейі ашылған болатын. Ал­маға қатысы бар аңыздар мен ер­те­­гілер, алманың әлемге қа­лай та­ра­­ғаны туралы әңгімелер, бақша­шылық және алманың тасасындағы тылсым мәндерге бойлататын тың ақпараттардың барлығын осы жерден табуға болады. Дәмі түгіл түрі де есі­­­­міз­ден шығуға шақ қалған әлем т­а­ныған Алматы апорты соң­ғы уа­қыттары қайта жаңғыртыла бастаға­нын газетіміздің өткен санда­рының бірінде сүйіншілеген едік.

Ал қала көшесінде оқшауланып тұр­ған алма толтырылған сары «Мос­квич» әкелеріміздің студенттік сәтте­рінің сарғайған сағынышы секілді елестейді.

Арман ОКТЯБРЬ,

«Egemen Qazaqstan»

АЛМАТЫ