«KazakhExport» экспорттық сақтандыру компаниясы күнбағыс майының қазақстандық өндірушісі «Сей-Нар» өндірістік кешені» ЖШС-не (Шығыс Қазақстан облысы) «Қазақстанның Даму Банкі» АҚ алдындағы екі миллиард теңге міндеттемелері бойынша кейіннен экспортқа шығарылатын, тазартылмаған өсімдік майын өндіру үшін шикізат (күнбағыс) сатып алу мақсатында алынған банк қарызын сақтандыру арқылы қолдау көрсетті.
«Сей-Нар» өндірістік кешені» ЖШС қызметінің негізгі бағыты – тазартылмаған өсімдік майы, шрот, ұн және ауыл шаруашылығының басқа да қайта өңделетін өнімдерін шығару болып табылады. Кәсіпорын өнім көлемінің 60%-нан астамын Қытай, Өзбекстан, Тәжікстан секілді шетелдерге шығарады.
Бөлінген қаражат есебінен компания қытайлық трейдермен жасалған экспорттық келісімшарт бойынша, сондай-ақ қолға алынған басқа да келісімшарттар бойынша міндеттемелерін орындауды жоспарлап отыр. Сақтандыру қорғанысының берілуі кәсіпорынның бүкіл жыл бойы үздіксіз өндірісін қамтамасыз ету үшін 20 000 тонна көлемінде күнбағыс сатып алу қажеттілігімен байланысты. Бұл шикізаттан компания 9 000 тоннаға дейін май өндіріп, өндірген өнімін Қытайға экспортқа өткізе алады. ҚХР компаниясымен жасалған экспорттық келісімшарттың жалпы сомасы он миллион АҚШ долларын құрайды.
«KazakhExport» экспорттық сақтандыру компаниясы» АҚ – «Бәйтерек» холдингінің еншілес компаниясы. KazakhExport экономиканың басым секторларында шикізаттық емес тауарлар, жұмыстар, қызметтер экспортының өсімін қолдау және қазақстандық кәсіпорындарды қаржылай-сақтандыру және қаржылай емес қолдау практикасын қалыптастырумен айналысады.