Сенбі, 11 ақпан 2012 8:23
Бейбіт күнде де ерлікке орын барын тәуелсіз елдің қырағы қырандары бұрнағы уақытта айқын дәлелдеп келеді. Демалыс күндері Петропавл қаласындағы Ішкі әскерлер Әскери институтының әскери қызметшісі аға сержант Виталий Елисов тілсіз жаудан адам өмірін арашалап, ажал алдында қалған әйелді құтқарып қалды.
Сенбі, 11 ақпан 2012 8:23
Бейбіт күнде де ерлікке орын барын тәуелсіз елдің қырағы қырандары бұрнағы уақытта айқын дәлелдеп келеді. Демалыс күндері Петропавл қаласындағы Ішкі әскерлер Әскери институтының әскери қызметшісі аға сержант Виталий Елисов тілсіз жаудан адам өмірін арашалап, ажал алдында қалған әйелді құтқарып қалды.
Оқиға ақпанның 4-і күні орын алды. Бұл уақытта Виталий облыс орталығынан шеткері жатқан Борки кентінің спорттық базасында болған еді. «Кенеттен жақын маңдағы жер үйлерден қатты жарылыс естілді. Еш ойланбастан, дереу сол жаққа қарай жүгірдім. Оқиға орнына жеткенде, түтінденіп жатқан үй есігінің алдында қолында сәбиі бар әйелді байқадым. Шұғыл арада оларды шығарысуға көмектестім», – дейді аға сержант Елисов, сол күндегі оқиғаны есіне алып. Сөйтсе, өртеніп жатқан үй ішінде жан-айқайы шыққан әйелдің дауысы естілген екен. Ішкі әскер жауынгері өз өміріне қауіп төнгеніне қарамастан, арғы бөлмелерге кірген. Жарылыстың салдарынан баспананың қабырғасы мен төбесі құлапты бұл уақытта.«Түтіннен үйдің ішінде түк көрінбей кетті. Әрі ауа да жетіспеді. Баспананың кейбір жерлерін от шалып үлгерді. Қолда бар көрпешікпен тез арада тілсіз жауды ауыздықтадым. Қатты түтіннен әйелді бірден табу мүмкін болмады. Содан соң құлаған тақтайларды қопарып, үйіндінің астында қатты күйік шалған адамды көрдім. Есінен танған екен. Шұғыл түрде үйіндіден босатып, аулаға алып шықтым. Алғашқы медициналық көмек көрсетіп, қауіпсіз жерге ығыстырдым», – дейді Виталий.Бұл кезде оқиға орнына өрт сөндірушілер келіп, тілсіз жауды толығымен ауыздықтады. Үй ішінен үш газ балоны шығарылды. Абырой болғанда, жарылыстан басқа ешкім зардап шеккен жоқ. Ал өлімнен адам өмірін арашалаған аға сержант Виталий Елисов қазір Әскери институт басшылығының қолдауымен жоғары наградаға ұсынылып отыр.Руслан ЖАНГУЛИН, аға лейтенант.Солтүстік Қазақстан облысы.