Сәрсенбі, 22 ақпан 2012 7:54
Қазір шекараны шындамай жайбарақаттыққа салынатын заман емес. “Қазанның қақпағы ашық болса, иттен ұят кетеді” дегендей, дербес, тәуелсіз мемлекеттердің шекарасынан сына тауып, заңсыз контрабандалық тауар өткізушілер көбейіп тұр.
Ал бір қуанарлығы, Қазақстан шекарашылары заманауи қондырғылармен жабдықталғандықтан да, бейне бақылау арқылы шекара маңында жорғалаған тышқанға дейін көріп отырады. Бірақ, “Ет тәттілігін қойса, мен ұрлығымды қояр едім” дегендей, бұрын контрабандамен пайда тауып жүргендер үйреншікті әдеттерін қояр емес.
Сәрсенбі, 22 ақпан 2012 7:54
Қазір шекараны шындамай жайбарақаттыққа салынатын заман емес. “Қазанның қақпағы ашық болса, иттен ұят кетеді” дегендей, дербес, тәуелсіз мемлекеттердің шекарасынан сына тауып, заңсыз контрабандалық тауар өткізушілер көбейіп тұр.
Ал бір қуанарлығы, Қазақстан шекарашылары заманауи қондырғылармен жабдықталғандықтан да, бейне бақылау арқылы шекара маңында жорғалаған тышқанға дейін көріп отырады. Бірақ, “Ет тәттілігін қойса, мен ұрлығымды қояр едім” дегендей, бұрын контрабандамен пайда тауып жүргендер үйреншікті әдеттерін қояр емес.
Жақында ҰҚК шекара қызметі “Оңтүстік” өңірлік басқармасына қарасты Жетісай шекара жасағы ірі контрабандалық тауарларды мемлекеттік шекарадан өткізу дерегін анықтап, қылмыскерлердің адымын аштырмады.
“Орынбай” шекара заставасының жасағы шекарадан алты шақырым алқапты сүзу барысында өзбекстандық 10 азамат пен қазақстандық 8 азаматты қылмыс барысында қолға түсірді.
Шекара маңына киіз үй тігіп, оған контрабандалық тауар жасырған қылмыстық топ КамАЗ, Зил және Урал жүк мәшинелерімен Өзбекстан шекарасына өтпек болған. Контрабандалық азық-түліктердің жалпы салмағы 27 тонна тартады. Сол маңнан, бұл айтылғандардан бөлек, 2420 қораптарға салынған азық-түлік пен халық тұтынатын тауарлар тәркіленген.
Бұл тауарлардың жалпы салмағы 19 тонна құрады. Одан бөлек 2620 бөтелке арақ жасырылған қойма табылды. Шекара жасақтары “Найман Бұхарбай” заставасының телімінде күдікті азаматты қолға түсірді. Ол сол маңдағы құрылыс қоймасында 1,5 литрлік ыдыстармен 270 қапқа жасырылған 10 тонна спиртті тығып жүргенге ұқсайды.
Содан соң шекара аймағынан бір шақырым қашықтықта тағы бір азамат ұсталған. Ешқандай құжат көрсете алмаған әлгі азамат осы маңда мал бағатын қойшымын дейді. “Қойшы” иелік етіп жүрген қыстауды тексергенде 600 қорапқа салынған кондитерлік өнімдер мен 5 тонна түсті металл анықталған.
Ал “Бимырза” шекара заставасының телімінде тағы бір құжатсыз жүрген азамат ұсталған. Өзінің айтуынша, бұл да “шопан” екен.
Бірақ, ол мал емес қораптарға салынған тауарларды бағып жүр. Қыстауды тінту барысында 200 қорапқа салынған кондитерлік өнімдер табылды.
Бүгінде осы деректер бойынша контрабандалық қылмысқа қатысы бар басқа да азаматтардың ісі нақтылануда. Өйткені, үлкен көлемдегі тауарларды жалғыз-жарым адамдардың шекарадан өткізуге талаптануы мүмкін емес. Контрабандалық жүктердің бағасы шығарылғаннан кейін осы іске қатысы бар азаматтарға қылмыстық іс қозғалмақ.
Бұдан бөлек, ҰҚК Шекара қызметі «Оңтүстік» Өңірлік басқармасы «Леңгір» жеке шекара комендатурасына қарасты «Тұрбат» шекара заставасының шекара жасағы Өзбекстан Республикасынан Қазақстанға қарай біреудің өткенін анықтап, ізіне түседі.
Іздестіру шаралары кезінде шекарадан заңсыз өтпек болған Өзбекстан азаматы қолға түсті.
Шекара бұзушыны тексеру барысында одан 12 500 өзбек сомы және 1,5 литрлік бөтелкеде ұнтақталған героин тәркіленді. Оның салмағы 9 келіге дейін тартады.
Қазіргі уақытта Оңтүстік Қазақстан облысы, Төлеби аудандық прокуратурасы Өзбекстан Республикасының азаматына қатысты Қазақстан Республикасы Қылмыстық Кодексінің 250-бабы 4-ші бөлімі бойынша қылмыстық іс қозғады.
Бақтияр ТАЙЖАН,
Оңтүстік Қазақстан облысы.