«Атамекен» Қазақстан Республикасының Ұлттық кәсіпкерлер палатасы, Әйелдердің кәсіпкерлікті қолдау қорымен бірлесе отырып, талантты және жаңа дизайнерлердің жұмыстарын қолдауға мүмкіншілік тудыруда. Алты жеңімпаздың әрқайсысы 1 млн. теңге көлемінде жүлде алатын болады.
Байқаудың мақсаты-отандық сәнді индустрияны дамыту, ұлттық мәдени дәстүрлерді сақтау, жаңа атаулар мен брендтерді ашу және қолдау, өндірістік кәсіпорындарды дизайнерлермен біріктіру.
Конкурсты өткізу мамандардың жаңа буынын анықтауға және бәсекеге қабілетті жаңа брендтерді құруға мүмкіндік береді. Кәсіпқойларға өткізілген бұл байқау өз брендін ілгерілетуге және қолда бар бизнесті кең көлемде насихаттауға жол ашады.
Байқау үш бағыт бойынша өтеді:
1) бірінші кезең - екі бағытта жүргізіледі, олар өтінімдерді қабылдау және іріктеу: 4 наурыздан бастап 15 мамырға дейін және 10 маусымнан бастап 15 қыркүйекке дейінгі аралықта; әр кезеңнің қорытындысы бойынша комиссия конкурс лауреаттары атағына 6 үміткерді іріктейді;
2) екінші кезең - 12 үміткерді қоғамдық онлайн дауыс беруге ұсыну және оның нәтижелері бойынша 6 конкурс лауреатын бекіту;
3) үшінші кезең – қазылар алқасының бас жүлдесін алу үшін алты жеңімпаздың ішінен бір жеңімпазды анықтайды.
Байқау ағымдағы жылдың желтоқсан айында лауреаттарды салтанатты түрде марапаттау рәсімімен аяқталады.