Алыптар анықталады

Алыптар анықталады

Бейсенбі, 7 маусым 2012 7:09

ДҮБІР

Олимпиадаға 50 күн қалды

Талдықорғанда ауыр атлетикадан Қазақстан чемпионаты өтуде.

1 маусым күні басталған ел чемпионаты бүгін аяқталады. Бұл бәсекенің ерекшелігі, онда Қазақстан чемпионы деген атақ үшін күш сынасудан басқа би­ыл­ғы Олимпия ойындарына қа­ты­сатын зілтеміршілердің есім­дері анықталады.

 

Бейсенбі, 7 маусым 2012 7:09

ДҮБІР

Олимпиадаға 50 күн қалды

Талдықорғанда ауыр атлетикадан Қазақстан чемпионаты өтуде.

1 маусым күні басталған ел чемпионаты бүгін аяқталады. Бұл бәсекенің ерекшелігі, онда Қазақстан чемпионы деген атақ үшін күш сынасудан басқа би­ыл­ғы Олимпия ойындарына қа­ты­сатын зілтеміршілердің есім­дері анықталады.

Қазақстан ұлттық құрама­сы­ның бас бапкері Алексей Ни осы чемпионатқа лицензия алған қыз-жігіттерден басқа тағы бір­неше болашағынан үміт күтті­ре­тін спортшыларды қосып отыр.

– Қазіргі кезде Лондонға 16 ауыр атлеттің баруға мүмкіндігі бар. Олар бірнеше айдан бері бас қосып, өздерінің соңғы дай­ындықтарын пысықтауда. Олар­дың барлығы да Талдықорғанда өнер көрсетуде. Ел чемпионаты 1 маусым күні басталғанымен, Ауыр атлетика федерациясы басшыларының шешімі бойынша, чемпионаттың жүлделері үшін таласатындар бір бөлек және Олимпиада жолдамаларын сарапқа салатындар бір бөлек жарысатын болып шешілді.

Олимпиада жолдамалары үшін таласатындар арасында Азия ойындары мен Азия бірін­ші­лігінің жүлдегері Кирилл Пав­лов (77 кг), әлем чемпио­на­тының қола жүлдегері Владимир Кузнецов (85 кг ), Олимпия ойындарының чемпионы, әлем­нің үш дүркін чемпионы Илья Ильин, әлем чемпионы Владимир Седов, Азия чемпиона­ты­ның екі дүркін жүлдегері Алмас Өтешев, Арли Чонтей, Фархад Харки, жастар арасындағы әлем чемпионатының жүлдегері Алек­сандр Зайчиков (94 кг) және Азия чемпионы, Азия ой­ын­дарының қола жүлдегері Сергей Истомин (105 кг) болса, әйелдер арасында әлемнің екі дүркін чемпиондары Зүлфия Чиншанло (53 кг) мен Майя Манеза (63 кг), Олимпия ойында­ры­ның күміс жүлдегері Ирина Некрасова (69 кг), әлемнің екі дүркін чемпионы Светлана Подобедова мен жастар арасын­дағы әлем чемпионатының жүл­дегері Анна Нұрмұхамедова (75 кг) және Олимпия ойындары­ның қола жүлдегері Мария Грабовецкая мен жасөспірімдер және жастар арасындағы әлем чемпионы Надежда Ногай (+75 кг) күш сынасады.

Міне, осылардың ішінен қай­сысының Лондонға жолдама ала­тыны өздерінің көрсеткен нәтижелеріне байланысты болады. Ауыр атлетика федерация­сы­ның бас хатшысы Меңдіхан Тәпсір үміткерлердің ел чемпио­натындағы нәтижелері әлемдік рейтингтің көш басында тұрған зілтеміршілердің көрсеткіш­те­рі­мен салыстырылатынын мәлім­деді. Оның айтуынша, чемпионатта кімнің нәтижесі жақсы болады, сол Олимпиада жолдамасына иелік етеді. Талдықор­ғандағы чемпионатта лицензия үшін тартысты болатынын бас бапкер Алексей Нидің сөзінен де аңғаруға болады.

Біз сол кезде ешкімнің атақ-даңқына қарамауға тиіспіз. Жа­ңылыспай, тек мықтылардың мық­тысын ғана Олимпиадаға таңдап алуымыз керек. Өйткені, спорттың бұл түріне мемлекет тарапынан үлкен қолдау көрсе­тілуде, – дейді ол.

Қазақстан чемпионаты аяқ­тал­ғаннан кейін ұлттық құрама мүшелері Талдықорғанның ірге­сіндегі Текелі қаласына жиналып, оқу-жаттығу жиынын жал­ғастыратын болады.

Бет қатталып жатқанда Тал­дық­орғанда өтіп жатқан ел чемпионатында мына спортшылар үздік нәтиже көрсетіп, Олимпиада жолдамасына ие болды. Ерлер арасында Илья Ильин, Алмас Өтешев, Арли Чонтей, Фархад Харки, қыздар арасында Майя Манеза, Зүлфия Чиншанло, Светлана Подобедова мен Анна Нұрмұхамедова енді ұлттық құрама сапында Лондон төрінде өнер көрсетеді.

Дастан КЕНЖАЛИН,

«Егемен Қазақстан».

––––––––––

Суреттерде: Илья Ильин, Алмас Өтешев, Зүлфия Чиншанло.

________________________________________

ҚОЛДА – 95 ЖОЛДАМА!

Кеше Лондон Олимпиадасына жолда­ма алған тағы 3 спортшының есімі белгілі болды. Соның екеуі жеңіл атлеттер болса, біреуі бессайысшы.

Жеңіл атлеттерімізден жолдамаға сырықпен секіруші (прыжки с шестом) Никита Филиппов пен 3 000 метрге жүгіруге қаты­сатын Артем Косинов ие болды. Алдыңғысы Алматы қаласының тумасы. 1991 жылы туған. Спорттың осы түрімен айналыс­қанына бірнеше жыл болған. Әзірше ол халықаралық жарыстарда айтар­лықтай жетістіктерге жетпесе де елішілік жарыстарда өзіне сырықпен секіруші бәсеке­лестерді шақ келтірмей жүр. Ал Артем Косинов болса, 1986 жылы Талдықорған қаласында туған. Олимпиадаға жолдаманы ол Ресей ашық чемпионатында 3 000 метрге жүгіру жарысында 8 минөт 31,06 секөнт нәтиже көрсетіп жеңіп алды.

Үшінші жолдаманы алған спортшы­мыз­дың есімі – Павел Ильященко. Қазіргі бессайыста сынға түсетін отандасымыз былтыр Аргентинада өткен жасөспірімдер арасын­дағы әлем чемпионатының күміс жүлдегері атанған. Ильященко – Астана қаласының тумасы. 1990 жылы туған.

Сөйтіп, жеңіл атлеттеріміз осы күнге дейін ең көп лицензия алған  спортшыларымыз болды. Олар 16 жолдамаға ие. Одан кейін командамен 13 лицензия алған су добынан ерлер құрамасы мен 9 жолдаманы жеңіп алған боксшылар бар. Ал кеше Талдықорғанда аяқталған ауыр атлетикадан Қазақстан чемпионатында 8 жолдаманың иегерлері анықталды.

Бұған дейін 92 жолдаманы қыздар ара­сындағы бокстан Саида Хасенованың жеңіп алғаны белгілі. Оның лицензиясы қазақ спорт тарихына жазылатыны сөзсіз. Өйт­ке­ні, ол қыздар боксында тұңғыш рет жолда­ма­ға ие болып отыр.

_________________________________________

 

Ұлттық  олимпия комитеті Лондон Олим­­пиадасының алдындажанкүйерлердің атрибуттар мен жанкүйерлер әнұранын ұсынды.

Жоғарыда сол киімдер мен жалаушалар көрсетілген. Ал әнұрандыЕскендір мен Бір­жан  Хасанғалиевтар жазған.

___________________________________________

 Арғы жақтан жаңалық

Ресей үкіметі Лондон Олимпиадасына баратын делегацияның алкогольді ішімдік тұтынуына тыйым салды.

Мұндай шешімді Ресейдің Спорт және туризм министрлігі Жазғы не Қысқы Олимпиадада болсын қалталы демеушілердің ресейлік спортшыларды ойын-сауық кештеріне қатысуға мәжбүрлейтіндеріне байланысты жасағанын айтты.

*   *   *

Біріккен Араб Әмірліктерінің зілтемірші қыздарына Лондон Олимпиадасында хиджабпен қатысуға рұқсат етілді.

Халықаралық ауыр атлетика федерациясы (IWF) мұсылман қыздардың талап-тілектерін ескеріп осындай шешім шығарды.

БАӘ-нің ауыр атлетика федерациясының прези­ден­ті шейх Сұлтан бин Минжирин осы мәселеге байланысты мынадай пікірін білдірді. «Бұл Ислам елдері үшін жақсы жаңалық. Әр адамның құқы ескерілген жағдайда халықтар арасында өзара сыйластық қалып­тасады. Енді бұдан былай мұсылмандарды діни көзқарасына байланысты алалаушылық болмайды деп сенемін», деді ол.