Мен бүгінгі жастарға шын мәнінде қызыға қараймын. Өйткені, олар тамаша уақытта өмір сүріп жатыр. Олардың ата-аналарының түсіне де кірмеген нәрселер қазіргі таңда ақиқатқа айналған.
Менің бүкіл еңбек жолым Батыс Қазақстан облысының Теректі ауданындағы астықты “Трудовик” кеңшарымен тікелей байланысты. Оның еңбек жеңісіндегі даңқты тарихы менің көз алдымда өтті. Кеңшар 23 мың гектардан астам жерге егін егіп, ауа райы қолайлы жылдары молынан өнім жинайтын. Сөйтіп, бүкіл республика бойынша алдыңғы саптағылар қатарынан көрінетін. Отанымыз үшін қиындыққа толы 90-жылдарғы келеңсіз үдерістер шаруашылық тағдырына да кері әсерін тигізді. Нәтижесіз жүргізілген тәжірибелер салдарынан кеңшар күйреп тынды. Уақыт өте қайта еңсе көтере бастаған ауыл экономикасын басқаруға еңбексүйгіштігімен және кәсіби дайындығымен танылғандар, қиындықтарға қасқайып қарсы тұра білгендер келді.
Мен зейнет демалысына шыққалы біраз уақыт болды. Жақында қалаға қоныс аудардым. Бірақ көктемде және жазда міндетті түрде туған Приречное ауылына – “Трудовик” кеншарының бұрынғы орталық усадьбасына келіп тұрамын. Әр келген сайын жерлестерімнің жаңа бір табыстарын көріп, көңілім өседі.
“Жол картасы” деген бағдарламаның табыстылығын айтсаңызшы! Осы бастамасы үшін біздің Президентімізге жұмыс тапқан, тұрғын үйге қол жеткізген адамдардың алғысы шексіз! Жөнделген жолдар, ауруханалар мен мектептер және жаңа балабақшалар үшін де ризашылықтары мол. Біздің балаларымыз жоғары оқу орындарын, колледждерді бітіргеннен кейін жұмыс таппай қиналып келгендері де жасырын емес. Ал қазір “Жастар практикасы” бағдарламасы бойынша оларға жұмыс беріледі. Сөйтіп, олар іс жүзінде тәжірибе жинақтауға мүмкіндік алып отыр.
Мен теректілік жерлестерім үшін шексіз қуаныштымын: олардың үйлеріне “көгілдір отын” – газ келді. Бұл – ауыл адамдарының өмір сүру деңгейі жаңа сапаға көтеріледі деген сөз. Сіздің бастамаларыңыздың барлығы қазақстандықтардың өмір сапасын жақсартуға бағытталған, құрметті Президент. Сіздің облысты газдандыру жөніндегі тапсырмаңыз қалай орындалып жатқаны туралы айрықша айтқым келеді. Бұған дейін облыс аумағында аты әлемге белгілі Қарашығанақ газ конденсаты кен орны бола тұра, көпшілігінің газ қызығын көре алмай отырғандары жергілікті тұрғындардың түсінбеушілігін туғызатын. Осындай жауапты да тағдыршешті міндеттерді жүзеге асыру кей жағдайда кадрларға, олардың біліктілігі мен кәсібилігіне байланысты екені байқалады.
Бақтықожа Ізмұхамбетов бұрынғы министр ретінде, біздіңше, қуат көздерінің құны мен маңызын жақсы білетін сияқты. Қысқа мерзім ішінде облыста газдандыру бағдарламасы бұрын-соңды болмаған ауқымға жетуі де сондықтан болса керек. Қазіргі кезде “көгілдір отын” облыс орталығы тұрғындарының үйлеріне ғана емес, Оралдан 600 шақырым қашықтықта жатқан Бөкей ордасы ауылдарына дейін жетіп тұр. Газдандыру бағдарламасына сәйкес 2010 жылы ауқымды жұмыстар атқарылуы тиіс. Қарашығанақ – Орал газ құбырының екінші кезеңінің құрылысы жүріп жатыр.
Осы жоба аяқталған кезде 92 мың тұрғыны бар 146 елді мекен “көгілдір отынға” қол жеткізетін болады. Бұл – облыстағы он екі ауылдық аудандар тұрғындарының тоғызынан астамы газбен қамтылады деген сөз.
Нұрсұлтан Әбішұлы, Сіздің кәсіпкерлер туралы айтқандарыңыз жүрегімізге өте жылы тиеді. Шын мәнінде іскер де ілкімді адамдар мемлекеттің экономикалық қуатын арттырып, жаңа әлеуметтік бағдарламалардың жүзеге асуларына мүмкіндіктер туғызады.
Мұны менің туған Теректі ауылымдағы мысалдардан да айқын көруге болады. Жергілікті кәсіпкерлердің бастамаларының арқасында жүздеген жұмыс орны құрылып, ауылдар инфрақұрылымы қайта жаңғыруда. Сөйтіп, ауыл адамдарының ертеңгі күнге деген сенімдері арта түскен. Көпшілігі таныс іскер адамдардан үлгі алып, жеке дүкендерін ашып алған. Өзінің шаруа қожалығын ұйымдастырғандары да бар.
Бұрындары өзіміздің отбасымызда да бизнеспен айналысатын адам пайда болады деп ойлаған жоқ едім. Менің үлкен ұлым Мұрат туған ауылында өзінің ауыл шаруашылығы кәсіпорнын құрып алды. Жағдайы жаман емес. Оған дипломы бар тәжірибелі агрономдық қызметі мен бала кезінен менің соңымнан қалмай жұмысқа араласқаны, жоғары оқу орнында оқып жүргенде жиын-терін кезінде комбайнда жұмыс істегені көп көмегін тигізгені тағы анық. Оның шаруашылығы қалыптасу кезеңінің барлық қиындықтарын еңсеріп, қазірде аяғынан нық тұр. Ауыл кәсіпкерлеріне мемлекет тарапынан үлкен жәрдем-көмек көрсетіліп келеді. Соның арқасында ұлымның шаруашылығы жаңа техника мен жақсы тұқымға қол жеткізіп отыр, өндірістік базасы бар. Ал ең бастысы – ұлым болашағына сеніммен қарайды. Кәсіпорнын дамытуды жоспарлап отырғаны да мемлекет қамқорлығының нәтижесі ғой деп білемін.
Біздерге, аға ұрпақ өкілдеріне балаларымыз үшін, Қазақстан халқын жаңа экономикалық өрлеуге сенімді бастап келе жатқан Президентіміздің батылдығы мен шешімділігі үшін қалай қуансақ та жарасатындай.
Төлепқали МҰҚАШЕВ, еңбек ардагері. Орал.