Биыл үшінші жыл қатарынан ұйымдастырылған форумды ашқан Е.Қарин әлемдік геосаяси өзгерістердің аясында Еуразия жаңа саяси және әлеуметтік-экономикалық трансформация кезеңіне кіретінін атап өтті. Қазақстан-Ресей сарапшылары әр кезде түрлі алаңдарда бас қосып, ең өзекті мәселелерді талқылап, талдау арқылы еңсеріп келе жатқанын жеткізді. Ал биылғы іс-шара Қазақстандағы ең маңызды саяси оқиға – президенттік сайлау қарсаңында өтіп жатқанын әріптестерінің есіне салды.
– Осыдан үш күн бұрын сайлау науқаны басталды. Үгіт-насихат жұмыстары өте белсенді өтуде. Науқанға әртүрлі кандидаттар қатысуда. Оның ішінде оппозиция да бар. Сайлау алаңында ешкім де ешкімді ығыстырмай, барлығына тең мүмкіндік, бұқаралық ақпарат құралдарына шығуға тең құқық, үгіт-насихат жұмыстарын жүргізуге де бірдей мүмкіндік берілді. Билік шынымен де ашық әрі бәсекелі сайлаудың өтуіне мүдделілік білдіруде. Бұл – Қазақстан Президентінің қағидатты ұстанымы. Елімізде болып жатқан сайлау процесі тағы бір ауқымды процесс – билік транзитінің бөлігі саналады. Алдағы науқанды билік транзитінің шешуші кезеңі деуге болады, – деді Е.Қарин.
Президенттің кеңесшісі елде шынайы өзгерістер болып жатқанын, биліктің ашық диалогқа мүдделі екенін, саяси үдерістің белсенді жүріп жатқандығын да тілге тиек етті.
Жалпы, Қазақстан-Ресей сарапшылар форумына қатысушылар аймақтағы елдер өздерінің халықаралық және аймақтық үдерістердегі рөлін айқындап алуға тырысып жатқандарын баса айтты. Осыған байланысты өңірлік ынтымақтастыққа ерекше маңыз берілуде.
Сонымен бірге халықаралық ахуал тұрақсыздық пен саяси және экономикалық ландшафтың динамикалық өзгеруімен сипатталуда. Сол себепті де әлемнің аймақтық және жетекші елдері арасындағы геосаяси, экономикалық және технологиялық бәсекелестік артып келеді.
Сарапшылардың айтуларына қарағанда, бұл тұрғыда Қазақстан мен Ресей Еуразия экономикалық одағының маңызды стратегиялық серіктестері ғана емес, екі елдің ынтымақтастығы Еуразиядағы өзара іс-қимылдың формасы мен мазмұнын айқындайды.
Мәселен, «Валдай» қорының өкілі Андрей Сушенцов жаһандық геосаяси трансформация, Еуразия экономикалық одағының дамуы, Қытайдың аймақтағы сыртқы саясаты мен сауда соғыстары туралы айта келіп, біздің өңірдегі мамыражай ахуал әлемге үлгі болатынын атап өтті.
– Орталық Азия, Ресей мен Қытайдың қарым-қатынастарында бүгінге дейін қандай да бір дағдарыстар тіркелген жоқ. Қарсылас ретінде де текетіресіп, бірін бірі жағадан алған емес. Бұл сенімге негізделген тұрақтылықты, өзара достықты, оған қоса аймақтағы бұлжымай орындалатын «ойын тәртібін» қарай отырып, Еуразияда дәл осындай жағдай орнайтын еді ғой деген ойға қаласың. Әрине бұған Еуропадағы қауіпсіздік шараларының теріс ықпалы болды. Ресей мен Еуропаның ара қатынасы шиеленіспегенде, Еуразияда дүрлігіс те, дүрбелең де болмас еді, – деді А.Сушенцов.
Сарапшылар екікүндік форумда Қазақстан-Ресей қатынастары мен екі елдің арасындағы медиасеріктестік, Орталық Азиядағы жаңа ынтымақтастық контурлары, сондай-ақ әлеуметтік шарттардың өзгеруі тәрізді өзекті мәселелерді талқыға салады. Сонымен қатар екі елдің арасындағы халықаралық күн тәртібінде тұрған маңызды мәселелерді, аймақтық саясат пен қауіпсіздік саласындағы соңғы оқиғаларды талдап, арадағы экономикалық және гуманитарлық байланыстарды қалыптастыру мен нығайту мәселелері бойынша пікір алмасады.