Кездесу барысында екіжақты ынтымақтастықты, оның ішінде парламентаралық үнқатысуды тереңдету мәселелері талқыланды. Тараптар Қазақстан Сенаты мен АҚШ Конгресінің аппарат қызметкерлері арасындағы байланыстарды одан әрі дамыту жайында айтты.
Сауда-экономикалық, атап айтқанда, шикізаттық емес сектордағы ынтымақтастықтың келешегі талқыланды. Өткен жылы біздің елдеріміз арасындағы тауар айналымы 37 пайызға өсіп, 2,24 млрд долларды құрады. Бұл ретте Қазақстанның АҚШ-қа экспорты 2,5 есеге өсті. «Біз осы жетістіктерді мақтан тұтамыз», деді Уильям Мозер.
АҚШ елшісі америкалық компаниялар ет өнімдерін ЕАЭО және Қытай нарығына экспорттау жөніндегі бірлескен жобаларға мүдделі екенін атап өтті. Сенат басшысы агроөнеркәсіп секторында жүргізілген реформалар, басқа да өзекті мәселелер туралы айтып, америкалық әріптестерін өздерінің озық тәжірибелерімен алмасуға шақырды.
Қазақстан мен АҚШ-тың аймақтық қауіпсіздікті қамтамасыз ету саласындағы ынтымақтастығы туралы айта келіп, тараптар Ауғанстандағы қақтығысты реттеудегі өзара іс-қимылдың маңызды мәселелерін атап өтті. Д.Назарбаева Қазақстанда өткен «Ауғанстандағы әйелдердің құқықтары мен мүмкіндіктерін кеңейту» конференциясы туралы, ауған қыздарын дәрігерлік мамандықтарға оқыту жөніндегі Қазақстан, Өзбекстан және ЕО-мен үшжақты бағдарламаның іске қосылғаны туралы хабардар етті.
Осыған байланысты әйелдердің жаһандық дамуы мен өркендеуі жөніндегі Иванка Трамп бастамасының маңызы атап өтілді. Жоба дамушы елдердегі 50 млн әйелге өзінің экономикалық әлеуетін жүзеге асыруға көмектесуге арналған. «Біз өңір әйелдеріне өздерінің экономикалық әлеуетін жүзеге асыруға мүмкіндік беру үшін осы бастаманы Орталық Азия мен Ауғанстанда жүзеге асыру мақсатында ынтымақтасуға дайынбыз», деп атап өтті Д.Назарбаева.