Қазақстан Республикасының Тұңғыш Президенті – Елбасы Нұрсұлтан Назарбаев белгілеген Жастар жылы еліміздің дарынды балаларына құрмет көрсетудің алғашқы салтанатын өткізудің таңдауы Қостанай қаласына түсті. Бұл қостанайлықтар үшін зор мәртебе, мақтаныш екені аян. Мұны облыс әкімі Архимед Мұхамбетов республикалық беделді балалар сыйлығының алғашқы лауреаттарын құттықтағанда да атап өтті.
– Еліміздің болашағына балайтын жас дарындарға арналған бұл сыйлықты тұңғыш тапсырудың Тобыл-Торғай өңірінде өтуі бекер емес деп білеміз. Өйткені Қостанай – халқымыздың тұңғыштарын берген топырағы құнарлы, қасиетті өлке. Қос өзеннің бойында тұңғыш рет тархан атағын алған батыр, мәмілегер Шақшақ Жәнібек, тұңғыш ғалым Шоқан, тұңғыш ағартушы Ыбырай, тұңғыш қазақ романын жазған Міржақып, тұңғыш кәсіби дәрігер Мұхамеджан Қарабаев, тұңғыш журналист Мұхамеджан Сералин, тағы басқа ірілеріміз туып, балалық шағын өткізді. Бүгін топ жарып, сыйлық алатын жас өрендеріміз ертең еліміздің көк байрағын желбіретіп, талай халықаралық деңгейдегі асуларды асып, биіктерді бағындыратынына біз сенімдіміз. Жас дарындарды жетістіктерімен құттықтай отырып, сіздердің ізденулеріңізге, еңбек етулеріңізге Елбасы Нұрсұлтан Назарбаевтың сындарлы саясаты арқасында елімізде барлық жағдай жасалғандығын айтқым келеді. Біздің облыста да мұның жақсы мысалдары бар, – деді Архимед Бегежанұлы.
«Жас өркен» балалар сыйлығы 14 аталым бойынша еліміздің 8 облысынан келген 28 жас дарынға және мұның сыртында қосымша аталымдармен балалар мен жасөспірімдер ұйымдары мен газеттер, балалар тақырыбына арналған жобаларға тапсырылды. Сыйлыққа ие болған жас дарындар ішінде қарымы қазірден көрінген қаламгерлер, әншілер, бишілер, шешендер, ақындар, блогерлер, спортшылар, зерттеушілер, тағы басқалар бар. Олардың әрқайсысы осы сыйлыққа дейін өздерін республикалық, халықаралық байқауларда мойындатып үлгерген. Ана сүті аузынан кетпеген бала болса да, олардың бұғанасы қатпай жатып, шығармашылық жолы, тындырған ісі таңғаларлық. Ал осы байқаудың бас жүлдесі «Жыл таңдауы» аталымы әнші бала Ержан Максимге берілді. Ресейдің «Бірінші арнасының» «Голос. Дети» тележобасына қатысқаннан кейін Ресейдің әйгілі мамандарының жоғары бағасына ие болып, таланты жарқырап көрінген 12 жасар баланың аты қазір алысқа кетіп үлгерді, Ержанның есімі бүгінде елдің аузынан түспейді. Ол Қостанайға құрқол келмепті, салтанатты шараға қатысқандар алдында ән шырқап берді. Оған облыс әкімі Архимед Мұхамбетов «Жас өркен» сыйлығының мазмұнын сыйдырған мүсіншені, диплом, ақшалай сыйлық сертификатымен бірге алтынмен апталған эксклюзивті ұялы телефон сыйлады.
«Болар елдің баласы он бесінде баспын дер» деген ғой халқымыз. Ержан он екіге енді келді. Ойын баласы кезі, бірақ ол ойын емес, ойдың жетегінде, алдына қойған мақсаты биік. Журналистердің қаумалап, «балаңыз үлкен сахнаға тым ерте шықты, бұл сізді ана ретінде қобалжытпай ма? Алда қандай жоспарлары бар?» деген сұрақтарына анасы Гүлмира Әлібек сенімді жауап берді.
– Ержан осыған дейін көптеген байқауларға қатысты, өзін сахнада еркін, сенімді ұстайды. Оған менің де сенімім мол. Алға қойған үлкен жоспарлары бар, бірақ оны айтқым келмейді, балам әлі жас, – деді Гүлмира. Қазақтың қара домалақ баласының дауысына берісі Ресей, арысы Еуропа елдері тәнті болды. Қазір бір жағынан мектептегі сабағына, екіншіден байқауларға дайындық, музыкалық білімін ұштау жұмыстарына үлгеруі тиіс Ержанның уақыты да тығыз. Ол анасымен бірге Қостанайдағы шара басталар алдында 10 минут қана бұрын ұшып келіп, байқау аяқталған соң «Голос. Дети» шулы жобаның қайта өтетін финалына қатысу үшін жолсоқты болып, Мәскеуге жүріп кетті.
«Жас өркен» балалар сыйлығын алған үздіктер қатарында қостанайлық бес талант төбе көрсетті. Мысалы, солардың арасында «Жас зерттеуші» аталымының жеңімпазы Алдияр Әміров информатиканы қызыға зерттейді. Республикалық, халықаралық байқаулардан жүлдесіз оралған емес. Ол мектепті бітірген соң программист мамандығын игеріп, зерттеумен, ғылыммен айналысуды мақсат тұтады. Арқалық қаласындағы Елена Цвентух басқаратын, жас ұрпаққа елге, жерге деген патриоттық тәрбие берудегі жарқын істердің үлгісін көрсетіп жүрген «Жас ұлан» балалар мен жасөспірімдер орталығы да сыйлыққа лайық деп табылды.
Дарынды балалардың еңбегін елеуді, оларды насихаттауды мақсат тұтқан жобаның ұйымдастырылуы да ерекше екенін айтқымыз келеді. Үздіктерді іріктеуге уақыт, заман талабына сай интернет желісі арқылы бұқара көпшіліктің өзі атсалысты.
– Бұл «Халық сүйіктісі» ұлттық сыйлығы аясындағы балаларға арналған алғашқы жоба. Байқаудың шарттары Фейсбук желісінде жарияланды. Желіде жұртшылық 14 аталым бойынша өзінің сүйіктісін ұсыну керек болатын. 300-ден аса пікірлер мен ұсыныстар жазылды. Сенатор Бірғаным Әйтімова басқаратын құрамына қоғам белсенділері, Парламент депутаттары кірген қазылар алқасы жұмыс істеді. Байқаудың екінші сатысына әр аталымнан 4 үміткерді алып, олардың арасында дауыс беру басталды. Бұл жерде қазылар алқасы байқау тәртібі жүйесінің бұзылмауын ғана қадағалап отырды, ал дауыс беріп, кімнің қандай орынға, Гран-приге кімнің лайықты екенін әлеуметтік желіде жұртшылық өзі шешті, – дейді «Республика-Өңір-Даму» қоғамдық қорының атқарушы директоры Әлібек Бәйнешов.
Міне, «Жас өркен» балалар сыйлығын алған жас дарындар осындай жүйемен анықталды. Тайында озған дарабоздарды халық өзі көреді екен.
ҚОСТАНАЙ