Конституциялық кеңестің төрағасы Қ.Мәми жетекшілік еткен делегация құрамына Кеңестің мүшесі В. Малиновский, Құқықтық қамтамасыз ету және халықаралық ынтымақтастық бөлімінің басшы қызметкерлері М.Бадалиев және Н. Тасболатов кірді.
Іс-шара 2016 жылы Қазақстан мен Ресейдің конституциялық әділет органдары арасында жасалған Ынтымақтастық туралы меморандум аясында Ресей тарапының бастамасымен жүзеге асырылды.
Сапар барысында Қазақстан делегациясы мен Ресей Конституциялық сотының құрамы арасында пікір және ақпарат алмасылды.
Судьялармен әңгімелесу барысында Қ.Мәми: «Кейбір институционалдық айырмашылықтарға қарамастан, біз ұқсас мақсаттарды көздейміз. Бұл Конституцияның үстемдігін, оған заңнама мен құқық қолдану практикасының сәйкестігін қамтамасыз етуге, адамның құқықтары мен бостандықтарын қорғауға тікелей қатысты», деді.
«Өзара іс-қимылдың мұндай форматы бізге жүктелген өкілеттіктерді іске асыру тәсілдері мен жолдарын, Негізгі Заңның жекелеген нормаларын түсіндіру және конституциялық құндылықтарды қорғау практикасын тереңірек зерттеуге мүмкіндік береді. Біздің қарым-қатынастарымыз алдағы уақытта да жемісті ынтымақтастық пен алда тұрған күрделі міндеттерді шешу кезінде өзара қолдау көрсету рухында дами беретініне сенімдімін», деп қорытындылады сөзін Қ. Мәми.
Конституциялық бақылауды жүзеге асыру сапасы белгілі бір шамада осы органдардың аппараттары қамтамасыз ететін ақпараттық-талдамалық және ғылыми-консультативтік сүйемелдеу деңгейіне де байланысты. Сондықтан Қазақстан Конституциялық кеңесі аппаратының қызметкерлері Ресей Конституциялық соты хатшылығы басқармаларының бастықтарымен келіп түскен өтініштерді қарау кезінде осы органдардың құрамдарымен өзара іс-қимыл мәселелерін талқылады.
Тұтастай алғанда, сапар Қазақстан мен Ресей Федерациясының Конституцияның үстемдігін қамтамасыз ету саласындағы ынтымақтастығына жаңа серпін беруге және екі мемлекеттің конституциялық даму процестеріне байланысты көптеген өзекті мәселелерді шешу жолдарын табуға мүмкіндік береді.