Биыл 2 миллион бала лагерьде демалады

Президент жанындағы Әйел­дер істері және отбасылық-демографиялық саясат жөніндегі ұлттық комиссия төрайымының орынбасары Елена Тарасенконың айтуынша, елімізде 6 миллионға жуық бала бар. Бұл Қазақстан халқының үштен бірін құрайды. 

Жаз күндері елімізде 236 қала сыртындағы лагерь, 11 мыңға жуық мектеп жанындағы лагерь, 1700-ден астам шатырлы лагерь жұмыс істейді. Онда 2 млн 842 мың оқушы қамтылмақ. Ал республикадағы лагерьлерде 2,1 млн астам оқушы демалады. Қала сыртындағы балаларды сауықтыру ұйымдарын республикамыздың оңтүстік өңірлерінде 1-10 маусым аралы­ғында, басқа өңірлерде 15-20 маусымнан кейін ашу жоспарлануда. 

«Сауықтыру ұйымдарының дайындығы қажетті деңгейде жүріп жатқан жоқ. Тек 48 қала сыртындағы балаларды сауық­тыру ұйымы ғана санитарлық-эпидемиологиялық қорытынды алған», деді Денсаулық сақтау вице-министрі Камалжан Нады­ров. 

Оның айтуынша, минис­тр­лік­тің бақылауында 7 мыңнан астам балаларды сауықтыру ұйы­мы бар, оның ішінде 236-сы – қа­ла сыртындағы балаларды са­уықтыру ұйымы. Сондай-ақ Ден­саулық сақтау вице-министрі «Мониторинг нәтижесі балалар лагерінде азық-түлікке байланысты жағдайлардың жиі орын алатынын анықтады. Яғни, тамақ өнімдерінің лабораториялық зерттеуге сай келмеуі, дұрыс дайындалмауы және сақталуы жағынан мәселелер туындайды», деді.

Ішкі істер министрінің бірінші орынбасары Марат Қожаев­тың айтуынша, маусым айында полицияда есепте тұрған жасөс­пі­рімдердің жұмыспен қамты­луын қамтамасыз ету үшін ІІМ «Жұ­­мыспен қамту» акция­сын өткізуді жоспарлап отыр. Қо­ғам­дық тәртіпті сақтауға, оның ішінде жазғы лагерьлер аума­ғын­да полицияның аумақтық ор­гандарының 3 мыңнан астам қыз­меткері жұмылдырылады.