Ақтау қаласында теңіз жағалауында FIA Халықаралық Автомобиль Федерациясының «Ралли Қазақстан – 2019» ралли-рейдтер бойынша Әлем Кубогы кезеңінің салтанатты мәресі өтті. Шиеленіске толы жарыс жолының қорытындысы бойынша қатарлық автошабандоз Нассер Әл-Аттия штурманы Матье Бомельмен бірге жеңіс тойын тойлады, екінші орынды ерлі-зайыпты Стефан мен Андреа Петерансельдердің экипажы иеленсе, үздік үштікті Якуб Пшигонски мен Тимо Готтшальк түйіндеді.
Соңғы шешуші алтыншы кезеңде шабандоздар Каспий теңізінің жағалауы сызығының бойымен Ақтау қаласынан солтүстікке қарай өткен ең қысқа 148 шақырымдық арнайы учаскеден өтті. Жарыстың соңғы күні Бернхард тен Бринкен мен Том Колсулдың командасы үздік нәтиже көрсетті. Бұл команда кешегі сәтсіздіктен кейін жүлделі орыннан алшақтаған болатын. Мәреге екінші болып француз Стефан Петерансель жетті. Жарыстың фавориті Нассер Әл-Аттия күннің үшінші нәтижесін көрсетті.
Алты кезеңнің қорытындысы бойынша Toyota Hilux автокөлігінде өнер көрсететін, «Дакар» ралли-марафонының қазіргі жеңімпазы Нассер Әл-Аттия «Ралли Қазақстан – 2019» кезеңінде топ жарды. Бұған жарыстың алдыңғы күндерінде қол жеткізілген қарсыластардан артықшылық көп әсер етті. Осылайша қатарлық «Ралли Қазақстан» кезеңінің екі дүркін жеңімпазы атанды.
– Мен «Ралли Қазақстанда» топ жарғаныма шын қуаныштымын. Біріншілікте көш бастап тұрмыз, бұл – нағыз фантастика. Енді Марокко раллиін күтеміз. Әлбетте, бұл – біз үшін жақсы жыл, алты жарыс және алты жеңіс. Біз соңғы учаскені ойдағыдай өттік, барлығын бақылауымызда ұстадық, – дейді «Ралли Қазақстан – 2019» жеңімпазы Нассер Әл-Аттия.
«Дакар» ралли-марафонындағы жеңістер саны бойынша рекордшы, «Ралли Қазақстан – 2019» кезеңінің дебютанты Стефан Петерансельге жеңіске небәрі 5 минуттан астам уақыт жетпеді.
– Бүгін біз Каспий теңізінің жағасында мәре сызығын кестік. Сөз жоқ, әдемі пейзаждар, тамаша жағажай. Бірінші күні біз көлік дөңгелегінің тесілуімен көп уақыт жоғалтып алдық. Содан кейін, үлкен қателіктерге бой алдырмадық, – деп әсерімен бөлісті Стефан Петерансель.
Аты аңызға айналған шабандоздың жұбайы және штурманы Андреа Қазақстан жолдарындағы раллидің жылдамдығына таңғалғанын айтады. Біз кейде сағатына 200 шақырымнан астам жылдамдықпен жүрдік. Мұндай жағдайда дұрыс навигация беру оңай емес. Мен «Ралли Қазақстаннан» үлкен тәжірибе алдым, деді Андреа Петерансель.
Маңғыстаудағы раллиде қазақстандық пилоттар мен штурмандар ралли-рейд әлемінің үздік өкілдерімен тайталасты, сондай-ақ ралли-рейд бойынша Қазақстан Республикасы Кубогының Ұлттық есебін анықтады. Ал қазақстандық командалар үшін ең үздік нәтиже Андрей Чередников пен штурман Игнат Фальковтың экипажымен қол жеткізілген 6-шы орын болды.
– Биыл «Ралли Қазақстан – 2019» тағы бір мәрте орасан зор халықаралық жарысқа айналды. Қазақстан алғаш рет 2017 жылы осы беделді Әлем Кубогының кезеңдерінің бірін өткізу құқығына қол жеткізді және сол уақыттан бастап біз жыл сайын ралли-рейдті ұйымдастыруда жаңа деңгейге шығуға ұмтыламыз. Жарыстың барлық қатысушылары маршрутқа және навигацияға, сондай-ақ «Ралли Қазақстан – 2019» додасының жалпы атмосферасына дән риза болды деп сеніммен айта аламыз. Қазақстандық спортшылар тәжірибесін арттыруда, ал еліміздегі автоспорттың дамуы әлемдік аренада еліміздің оң имиджін қалыптастыруға септігін тигізуде, – деп атап өтті Қазақстан Автомотоспорт федерациясының президенті Марат Әбіқаев.
Т2 санатында Toyota Land cruiser автокөлігін тізгіндеген тағы бір қатарлық шабандоз Моххаммед Әл-Меер дара шықты. Екінші орынды түркіменстандық Шамырат Гурбановтың экипажы иеленді. Ал бұл серияның қола жүлдесіне қазақстандық «Aktau Motorsport» командасының өкілдері Кирилл Черненков пен Алексей Мун қол жеткізді. Ақтау автожарысшылары жарыстың барлық күні жақсы өнер көрсетті, бірақ ралли спорттық ережелерін сақтамағаны үшін алған көп сағаттық пенализациялар экипажға бұдан да жоғары орындарға үміткер атануға мүмкіндік бермеді. Жалпы есепте Т3 санатында Бразилиядан келген автожарысшы Рейналдо Варелаға тең келер шабандоз болмады. Испания елінің өкілі Хосе Луис Пена Кампо жалпы есепте көшбасшыдан бір жарым сағатқа жол беріп, екінші орынға табан тіреді.
«Ралли Қазақстан – 2019» Ұлттық есебінде «КАмАЗ-мастер» командасы мен пилот Дмитрий Сотников жеңіске жетті. Екінші және үшінші орындарды «ГАЗ Рейд Спорт» командасынан Михаил Шкляев пен Алексей Хлебовтың экипаждары иеленді.
Енді пилоттар 2019 жылғы ралли-рейд бойынша қазан айында Мароккода өтетін FIA Әлем Кубогының келесі және соңғы кезеңіне дайындалмақ.
Маңғыстау облысы