2019 жылдың үшінші сәуірі мен оныншы маусым аралығында өткізілген, яғни табаны күректей үш ай жеті күнге созылған дүбірге толы жарыс спортты білім беру жүйесінің басты элементтерінің бірі ретінде дамытуға негіз қалағаны хақ. Екіншіден, универсиада бұқаралық спорттың өрісін өсіру мен саламатты өмір салтын өрістете түсуге де жаңаша серпін бергенін айтуға тиіспіз.
Универсиада ойындарының кейбір түрлері еліміздің Алматы, Шымкент, Өскемен, Орал және Тараз қалаларында өткізілгенімен, оның негізгі салмағы Ақтөбеге түскені талас туғызбайды. Айталық, өткен жылы Талдықорған қаласында аяқталған ІХ Жазғы универсиадада еліміздің 52 жоғары оқу орнының спортшылары бақ сынаса, биыл Ақтөбедегі Қ.Жұбанов атындағы өңірлік мемлекеттік университеттің базасында өткізілген байрақты бәсекеге ЖОО-ның командалары қатысып, спорттың 38 түрі бойынша бақ сынады. Сондай-ақ Х Жазғы универсиадаға 480 командадан 4025 спортшы қатысқаны атап айтуға тұрарлық. Бұл көрсеткіш былтырғы жылмен салыстырғанда 70 пайызға артық.
Универсиаданың салтанатты түрде жабылу рәсімі кезінде Білім және ғылым министрлігі Ұлттық ғылыми-практикалық дене тәрбиесі орталығының бас директоры Садық Мұстафаев сөз тиегін осы арнадан сабақтады. Осы арада жалпы командалық есепте бірінші орынды Әл-Фараби атындағы Қазақ ұлттық университетінің командасы ұтып алғанын айтуға тиіспіз. Қ.Жұбанов атындағы Ақтөбе өңірлік мемлекеттік университетінің командасы жүлделі екінші орынды еншіледі. Ал үшінші орынды І.Жансүгіров атындағы Жетісу мемлекеттік университетінің спортшы студенттері қанжығасына бөктерді.
Сонымен бірге X Жазғы универсиада сайыстары кезінде М.Х.Дулати атындағы Тараз мемлекеттік, Қ.А.Ясауи атындағы Қазақ-түрік және С.Аманжолов атындағы Шығыс Қазақстан мемлекеттік университеттерінің командалары сәтті ойын өрнектерін көрсете білді. Олардың бәрі Білім және ғылым министрлігі мен Ұлттық ғылыми-практикалық дене тәрбиесі орталығының құрмет граммоталарымен арнайы марапатталды және кубоктар мен естелік медальдарға ие болды.
Ақтөбе қаласында аяқталған X Жазғы универсиаданың жеңімпаздары биыл Италияның Неаполь қаласында өткізілетін XXX Жазғы бүкіл дүниежүзілік универсиадаға қатысып еліміздің намысын қорғамақ.
Ақтөбе