Өткен жұмада Үкіметтің баспасөз алаңында өткен жиында Сыртқы істер министрінің орынбасары Ермек Көшербаев осы бағытта атқарылған жұмыстармен таныстырды.
− Бүгінде Қазақстан тартылған тікелей шетелдік инвестиция көлемі бойынша Орталық Азияда көш бастап отыр. Тәуелсіздік жылдарында ел экономикасына 320 млрд АҚШ долларынан астам тікелей шетелдік инвестиция тартылды. 2018 жылы инвестицияның жалпы ағыны өткен жылмен салыстырғанда 15,8 пайызға өсіп, 24,3 млрд АҚШ долларын құрады, – деді министрдің орынбасары.
Осы ретте ол инвестиция тарту жаңа жұмыс орындарын құрып, қазақстандық кадрлардың әлеуетін арттыратынын, инновациялық технологиялардың трансфертіне түрткі болатынын, мемлекет бюджетіне салық түсімдерін ұлғайтатынын баса айтты. Сонымен қатар инвестиция тартудың жаңа жүйесінің бұған дейін қолданыста болған жүйеден айырмашылығына кеңінен тоқталды.
− Біріншіден, біз шетелдегі мекемелермен өзара іс-қимылды күшейтіп, инвестиция тартудың негізгі құралдарының бірі ретінде аталған инфрақұрылымдарды пайдаланамыз. Яғни, біздің толықтай алғанда шетелде 93 миссиямыз бар. Олардың барлығы да жаңа инвестиция тартумен және экспорттық саясатты үйлестірумен белсенді жұмыс жүргізіп жатыр. Біз шетелдік мекеме-орталық-өңір форматында үш деңгейлі жүйе құрдық. Бұл барлық деңгейдегі әрбір инвестормен және жобамен нақты жұмыс істеуге мүмкіндік береді. Мұндай тетік өңірлердің жобалары үшін шетелдік мекемелерге әлеуетті инвестор іздеуге және керісінше тікелей тасымалдауға мүмкіндік береді, – деді Е.Көшербаев.
Белгілі болғандай, әлеуетті инвестор елдерді қамту географиясы кеңейеді. Бұл ретте Қазақстан экономикасының басым секторына инвестиция тарту үшін 40-қа жуық инвестиция құюға дайын ел айқындалған. Бұл ретте алдыңғы қатарлы елдерге, әсіресе АҚШ, Германия және Жапонияға баса назар аударылады. Үшіншіден, инвестициялық шаралар ұйымдастырылмақ. Мәселен, жыл басынан бері 17 инвестициялық шара ұйымдастырылып, бірқатар маңызды стратегиялық құжатқа қол қойылған. Бүгінде елімізде атқарылып жатқан жұмыстардың басты мақсаты – инвесторларды ел экономикасының маңызды секторларына тарту.
− Ірі жобаларды іске асыруға елеулі қорлары бар басым салалар анықталды. Бұл – азық-түлік өнеркәсібі, агрохимия, ауыл шаруашылығы машинасын жасау, газ химиясы, ақпараттық-коммуникациялық технологиялар, тау-кен металлургия кешені. Қазіргі таңда «Kazakh Invest» ұлттық компаниясымен бірлесіп аталған салаларда жобаларды пысықтап жатыр, – деді Е.Көшербаев.