Өңірдегі егін шаруашылығы десе еске Шарбұлақ ауылдық округіндегі «Сапа-2002» шаруа қожалығы түседі. Биыл да жылдағы шаруақорлығынан жаңылмаған қожалық алқаптағы алтын астықты төкпей-шашпай жинап алуға кірісті. Агротехникалық талаптарды тиянақты атқарған кәсіпорын 2000 гектарға жуық алқапқа егілген арпа мен бидайды жинауға 10-ға жуық агротехника тартып, 20 шақты адамды еңбекке жұмылдырды.
– Алқапқа бидайдың 24 сортын сепкенбіз. Алдын ала болжам бойынша әр гектарынан 30-35 центнер өнім аламыз деп отырмыз. Алдағы уақытта 3 сорт тұқымын (алтын масақ, кондитер, шөп) көбейтіп, өндіріске қоймақпыз. Мақсатымыз Сарыағаштың ғалымдарымен келісімшартқа тұрып, тұқым сапасын одан да сапалы ету, – дейді «Сапа-2002» ЖШС директоры Нұржан Әшіров.
Шаруалар ауа райы қолайсыздау болғанымен қамбаға түсер өнім былтырғыдан кем болмайтынын айтуда. Себебі агротехникалық шаралар дер кезінде жасалып, мемлекет тарапынан берілетін арзан жанар-жағармай мен минералды тыңайтқыштар уақтылы берілген. Аудан әкімі Төлеген Телғараевтың айтуынша, аудан бойынша егін оруға қажетті 218 комбайн, 125 тасымалдаушы техника, 103 трактор тіркемелері сақадай сай. «ДжонДир» компаниясы ұсынған су жаңа техникалар шаруалардың қажетін толық өтеуге тиіс.
Айта кетерлігі, ағымдағы жылы Түркістан облысы бойынша ауыл шаруашылығы дақылдарының егіс көлемі 823 мың гектарға жетті. Бұл өткен жылмен салыстырғанда 9,8 мың гектарға артық. Облыс бойынша бидай 178,7 мың гектарға егілді. Алдын ала болжам бойынша 218,6 мың га масақты дақылдардың әр гектарынан орташа есеппен 21,2 центнерден өнім алу жоспарлануда. Астық оруға қолда бар 1012 комбайнның 90-95 пайызы ору, жинау жұмыстарына пайдаланылып жатыр.
Күні бүгінге дейін188 мың тонна картоп, 418 мың тонна көкөніс, 125 мың тонна бақша дақылдары жиналған. Қазіргі таңда ішкі сұраныстан артық көлемі Нұр-Сұлтан, Алматы қалалары мен басқа облыстарға және шетелге экспортталуда.
Облыстық ауыл шаруашылығы басқармасы таратқан ақпаратқа сүйенсек, күнгейлік еңбекқор диқандар жыл соңына дейін картоп, көкөніс, бақша өнімдерінен 2,7 млн тонна өнім жинауды жоспарлап отыр.
Қазығұрт – Шарбұлақ