5 шілде күні Алатау баурайындағы «Балуан Шолақ» спорт сарайында өткен бокс кешінің басты жекпе-жегі қазақстандық былғары қолғап шебері Қанат Ислам (26-0, 20 КО) мен Доминикан Республикасының боксшысы Хулио де Хесус (27-2, 24 КО) арасында өткен болатын.
Аталған жекпе-жек басталмас бұрын, «Балуан Шолақ» спорт кешенінің ішіне лық толған жанкүйер кəсіпқой бокста бақ сынап жүрген бір топ қазақстандық былғары қолғап шеберлерінің өнерін тамашалады. Атап айтқанда, Сапарбай Айдаров (3-0, 2 КО) кештің шымылдық ашар жекпе-жегінде украиналық қарсыласы Владислав Танцюраны (2-3, 1 КО), Өзбекстан боксшысы Бексұлтан Раушанов (5-1, 3 КО) әзербайжандық Асқар Рагимовты (3-3, 1 КО), Берікбай Нұрымбетов (4-0, 0 КО) армениялық Карен Аветисянды (9-25-4, 4 КО) ұпай санымен жеңді. Сондай-ақ Арман Рысбек (6-0, 5 КО) украиналық Денис Чечетаны (9-14-2, 8 КО), дебют жекпе-жегін өткізген Асқар Ерубек (1-0, 1 КО) Беларусь боксшысы Андрей Сталярчукты (11-34-6, 2 КО) бірінші раундтың өзінде естен тандырып, нокаутпен жеңіске жетті. Тағы бір дебют жекпе-жегін өткізген ауыр салмақтағы отандасымыз Нұрсұлтан Аманжолов (1-0, 0 КО) украиналық Павел Кроленкодан (1-3, 1 КО) ұпай санымен басым түсті. Қазақ спорт журналистикасының ардагері Дүрәлі Дүйсебай боксшы Аманжоловтың жекпе-жегін көріп, әлеуметтік желіде қазақтың ғаламат былғары қолғап шебері Әбдісалан Нұрмахановтың ізбасары екенін жазды. «Осы жігітке қарап отырып, Әбдісалан Нұрмаханов есіме түсіп кетті. Сыртқы тұрқы да, кескін-келбеті де сол. Алда-жалда ағамыз туралы кино түсіре қалсақ, есте болсын дегенім ғой. Яғни, актерді сырттан іздеудің қажеті жоқ», дейді Дүрәлі аға.
Андеркардтың файт-кардында титулды жекпе-жекке шыққан Абылайхан Құсайынов (10-0, 7 КО) армениялық Гарник Арутюнянды (3-2, 2 КО) үшінші раунда техникалық нокаутпен жеңіп (анығында Арутюнян айқасты жалғастырудан бас тартты), карьерасындағы тұңғыш белдігін иеленді. Сонымен қатар осы жекпе-жек үшін арнайы АҚШ-тан келген бірінші орта салмақтағы жерлесіміз Мадияр Əшкеев (13-0, 6 КО) украиналық боксшы Игорь Фаниянмен (16-21-3, 8 КО) жұдырықтасып, NBA белбеуін жеңіп алды. Тартысқа толы болған жекпе-жекте отандасымыздың қабағы жарылып, қан тоқтамаған соң айқастың суперфайзері жарыс ережесіне сәйкес кездесуді жетінші раундта тоқтатып, жеңісті ұпай санымен алда тұрған Әшкеевке берді. Ал ауыр салмақтағы Руслан Мырсатаев (6-0, 6 КО) болса, әйгілі боксшы Майк Тайсонды жеңген британиялық Дэнни Уильямсті (53-27, 40 КО) жекпе-жектің төртінші раундында техникалық нокаутқа түсірді.
Ал бокс кешінің басты жекпе-жегі жоғарыда айтқанымыздай, Қанат Ислам мен доминикандық боксшы Хулио де Хесус арасында өрбіді. Ол оған дейін өткізген 28 жекпе-жегінің тек біреуінде ғана жеңілген, әлемдік рейтингте 320-орында тұрған боксшы. Барлық кездесулерін өз елінде өткізіп, бірінші рет шетелде жұдырықтасқан боксшыны мамандар кездесуге дейін Қанат Исламға лайықты қарсылас емес деп бағасын беріп тастаған еді. Он раундтық форматта өткен жекпе-жекте жүлде ретінде орта салмақтағы WBO Inter-Continental тұжырымының белдігі тігілді. Бұл айқаста Қанат қарсыласын бар-жоғы 14 секундта бір соққымен сұлатып салды.
Қазір әлеуметтік желі қолданушылары Қанаттың бұл жеңісін кәсіпқой бокстағы ең жылдам жеңіс па, жоқ па деп талқылап жатыр. Бір білеріміз, Қанат өзінің карьерасындағы ең жылдам жеңіс рекордын жаңартты. Отандасымыз 2012 жылы эквадорлық қарсыласы Умберто Толедоны бірінші раундтың 33 секундында сұлатып салған-ды.
Дегенмен Қанат Исламның бұл жеңісіне, қарсыласына көңілі толмаған жанкүйерлер де табылып жатты. Соның бірі – спорт журналист Несіп Жүнісбай ағамыз. Несіп Жүнісбай Қанаттың «қапшық» қарсыластармен емес, өзінің деңгейіндегі қарсыластармен жұдырықтасатын уақыты келгенін айтады. «Мен Қанатты Бейжің Олимпиадасынан бері танимын. Оның бокстағы жолын үнемі қадағалап отырамын. Сол Бейжің Олимпиадасында көрген Қанат мен күткен шыңына әлі шыққан жоқ. Өйткені оны өз салмағындағы мықтыларға салмай келеді. Сонау жер түбінен Алматыға келіп тұрып, бірінші раундтың 14-секундында мұрттай ұшатын боксшы кімге абырой? Сол үшін де Қанатты аспанға көтеру керек пе? Бұл – өзегімізді жарып шыққан өз баламызға жасаған көз байлау, өтірік мақтау және оны шындықтан адастыру. Әрине, бұған Қанат кінәлі емес. Оған қарсылас тауып, беттестіріп отыратын командасы кінәлі. Реніш – соларға. Ал бүгінде отыздың ортасына келген Қанат айналайын мықтылармен қашан шайқасады? Шайқасып үлгере ме? Әлде оның командасы секілді бізге де жеңілмеген деген желпілдек атақ жете ме? Сонда кімнен жеңілмеген? Кешегі өзін көрмек түгілі атын да естімеген Доминикан Республикасынан келген боксшы секілді боскеуделерден бе? Менің ойымша, одан да Альварес секілділермен шайқасып, жеңіліп қалған әлдеқайда абыройлы болар еді. Әрине, Қанатқа Альваресті ертең ешкім бермейді. Сондықтан да қарсыластың ең ауырын, ең шеберін таңдап, кескілесу керек бұл өнерде. Сонда ғана күштіден күштіге өрлейсің», дейді Н.Жүнісбай.
Сонымен 34 жастағы Қанат Ислам өзінің 26-шы жекпе-жегінде жеңіске жетіп, орта салмақтағы WBO Inter-Continental белдігін иемденді. Несіп ағамыз айтып кеткендей, қазақ жанкүйерлері енді Қанат Исламның өзіне лайықты қарсылас болатын, əлемдік кəсіпқой бокста аты шыққан əлді боксшылармен жұдырық түйістіргенін қалайды.
Алматыдағы боксшылардың жеңіс шеруін 6 шілде күні елордада өткен бокс кешінде жұдырықтасқан отандастарымыз да жалғастырды. Сондай-ақ Нұр-Сұлтанда өткен кәсіби бокс кешінің Алматыдағы айқасқа қарағанда жүгі ауыр еді. Өйткені жекпе-жекті шетелдік промоутерлер ұйымдастырып қана қоймай, боксшылардың айқасын АҚШ-тың ESPN+ телеарнасы бірнеше елге тікелей эфирде таратты. Сонымен қатар қазақ батырларының жекпе-жегін тамашалап, өз көзімен көру үшін АҚШ-тан әйгілі промоутер Боб Арумның өзі арнайы келді. Арумның көзіне түсіп, мұхит асқысы келетін отандастарымыз бұл кездесуде барын салды. «Барыс Аренаға» келген жанкүйерлерге тамаша бокс үлгісін көрсету үшін де былғары қолғап шеберлеріміз аянып қалмады.
Бокс кешін ашып берген Абай Төлеш (3-0, 2 КО) ауғанстандық Аллах Дэд Рахимимен (2-1, 0 КО) жұдырықтасып, карьерасында бірінші рет қарсыласынан төрешілер шешімі бойынша басым түсті. Әбілқайыр Шеғалиев (6-0, 4 КО) әзербайжандық Эльвин Ахундзаданы (4-2, 2 КО) бірінші раундта екі рет, екінші раундта бір рет нокдаунға жібергенімен, Ахундзада отандасымызға лайықты қарсылық көрсетіп, 8 раунд бойы жұдырықтасты. Шеғалиев ұпай санымен жеңіске жетті. Сұлтан Зауырбек (8-0, 6 КО) грузиялық Георгий Гачечиладзені (11-34-1, 5 КО) жетінші раундта техникалық нокаутпен ұтты. Отандасымыз бірінші раундта қарсыласын бір рет нокаутқа жіберген болатын. Әли Балоев (9-0, 7 КО) бразилиялық Хамильтон Вентураны (15-7-1, 13 КО) ұпай санымен жеңсе, Нұртас Әжбенов (6-0, 2 КО) грузиялық Ачико Одикадзені (18-11-1, 7 КО) кездесудің бірінші раундында сұлатып салды.
Титулды жекпе-жекке шыққан Виктор Коточигов (10-0, 4 КО) мексикалық Хаиро Лопеспен кездесуде (24-11, 16 КО) төрешілердің бірауыз шешімімен жеңіске жетіп, WBC International белдігін иеленді. Сондай-ақ Жанқош Тұраров (суретте) (27-0, 17 КО) аргентиналық Мауро Максимилиано Годоймен WBO Inter-Continental белбеуі үшін жұдырықтасып, 10 раундқа жоспарланған жекпе-жекте отандасымыз үшінші раундта техникалық нокаутпен жеңіске жетті.
Бокс кешін тамашалауға алыс-жақын шетелден бірнеше мәртебелі мейман келгенін де айта кетейік. Оларың қатарында орта салмақтағы әлемнің экс-чемпионы британиялық Билли Джо Сондерс бар. Жекпе-жек соңында Джо Сондерс шаршы алаңға көтеріліп, Геннадий Головкинмен Нұр-Сұлтан қаласында кездесу өткізуге дайын екенін айтты. «Қонақжай көңілі үшін Қазақ халқына көп рахмет айтамын! Қазақстандағы бокс жанкүйерлері мені қатты таңғалдырды. Мен дәл осы «Барыс Аренада» Геннадий Головкинмен жұдырықтасқым келеді. Ол – ұлы чемпион, менің онымен өз отанында кездесуге мүмкіндігім бар. Менің промоутерім Фрэнк Уоррен алдағы уақытта маған қандай жекпе-жек ұсынатынын білмеймін, бірақ мен осы жерде, «Барыс Аренада» жекпе-жек өткізгенді қалаймын. Головкин, мен сенің өз Отаныңда жекпе-жек өткізуге ұсыныс тастаймын», деп мұзайдынға жиналған жанкүйерлерді бір желпіндіріп тастады.
Жалпы, еліміздің екі бас қаласында екі күнге созылған кәсіпқой бокс кеші жанкүйерге және Елорда күніне тамаша тарту болды. Жекпе-жекке шыққан барлық отандасымыз жеңіске жетіп, Қазақ елін жауынгер халық ретінда әлемге көрсетті.