Қиырдағы қандастарымыз қазақ тілін қаншалықты біледі? Өзге елде өмір сүріп жатқан ағайынның ана тілімізге деген құрметі қандай дәрежеде? Атырауда өткен «Қазақстан – ата жұртым, қасиетім – ана тілім» атты қазақ тілі мен әдебиетінен халықаралық олимпиада қорытындысы жақсы көрсеткіштермен көңіл қуантты. Қытай, Моңғолия, Ресей, Қырғызстан, Иран, Өзбекстан мемлекеттерінен келген қазақ балалары Атырауда төрт күн бойы біліктіліктерін сынға салды.
– Қазақ диаспорасы өкілдерінің басқа елдерде тұрса да, ана тілдерін жетік меңгергендері, өз тілдерінде сөйлеп, білімдерін жетілдіретіндері анық көрінді, –деді олимпиада жүлдегерлерін марапаттау салтанатында облыс әкімінің бірінші орынбасары Серік Шапкенов. – Халық даналығында айтылғандай, өз тілін ұмытқан ұлт тамырын жоғалтады. Ұлттық құндылықтарды бойларына сіңірген осындай балалар барда қазақ тілінің болашағы да баянды.
Халықаралық олимпиада қорытындысы бойынша, бес қатысушы алтын медаль, 8 қатысушы күміс, 15 қатысушы қола медаль иеленді.
Облыстық білім беру басқармасы басшысының міндетін атқарушы Жансұлу Төремұратова олимпиада жүлдегерлеріне еліміздегі бес университетте тегін оқу гранты берілгенін айтады. Білім додасына қатысқан 62 оқушының ешқайсысы атаусыз қалмады. «Дарын» республикалық ғылыми-тәжірибелік орталығы дәстүрлі түрде ұйымдастыратын білім жарысына осы жолы Атырау облысы әкімдігі қолдау көрсетті. Атажұрттан алыста жүрген қазақ балаларын ынталандыруға бағытталған шара биыл 16-шы рет өтіп отыр. Ұйымдастырушылар өнер-білім бәйгесінде, әсіресе Өзбекстаннан келген оқушылардың жақсы нәтиже көрсетіп, марапаттардың басым бөлігін жеңіп алғандарын айтты.