«Сарыарқа» газ құбыры желісінің құрылысы 2019 жылдың қазан айында аяқталады деп күтілуде. Жоба толығымен 2020 жылы іс жүзіне асырылып, газ құбырының желісі толық салынып бітеді.
«Самұрық-Қазына» ұлттық әл-ауқат қоры» акционерлік қоғамы басқармасының төрағасы Ахметжан Есімов «Сарыарқа» магистралдық газ құбыры желісінің салынып жатқан 820-шы шақырымына барған сапарында осы және өзге де мәселелер туралы тілге тиек етті.
Газ құбыры Қазақстанның Тұңғыш Президенті – Елбасы Нұрсұлтан Назарбаевтың тікелей тапсырмасы бойынша салынып жатқанын айта кеткен жөн. Көптен бері айтылып жүрген газ желісі Қазақстанның астанасын, елдің орталық және солтүстік өңірлерін газбен қамтамасыз етуге арналған.
Жалпы, Ахметжан Есімов қарқынды жүргізіліп жатқан құрылыс объектісіне оң баға берді. Дегенмен, құрылыс орнында әлі де пысықтайтын шаруалар бар. Есімов жауапты тұлғаларға құрылысты белгіленген уақытта аяқтап, сондай-ақ іске қосу-жөндеу жұмыстарының өз мерзімінде жүзеге асырылуын қамтамасыз ету қажеттігін атап көрсетті.
«Қазіргі таңда газ құбыры құрылысының 75 пайызы аяқталған. Құбырларды жалғау жұмыстары Қарағанды мен Ақмола облыстарында жүргізілуде. «ҚазМұнайГаз» ҰК» АҚ әкімдіктермен бірлесе отырып, құрылыстың желілік жағы тәмамдалғаннан кейін елді мекендер мен астананы газбен жабдықтауға кіріседі», дейді Сағидолла Мақашев.
Айта кетейік, «Самұрық-Қазына» қоры осы ірі жобаны қаржыландыруға қатысып отыр, негізгі мердігер – «ҚазҚұрылысСервис» компаниясы, операторы – «Астана Газ ҚМГ» компаниясы. «Сарыарқа» газ құбыры «Бейнеу – Бозой – Шымкент» магистралының газ құбырынан басталады. Газ құбырының ұзындығы 1061 шақырым және бұл 1,7 млн тұрғыны бар 171 елді мекенді қамтымақ.