Елордада Қазақстан кубогының финалы өтті. Қызылорданың «Қайсар» футбол клубы мұнайлы өлкеден келген «Атырау» командасын 2:1 есебімен жеңіп, өз тарихында осымен екінші мәрте Қазақстан кубогын жеңіп алды.
Бұл екі команда жаз ортасында Қазақстан кубогының финалына шыққан соң, чемпионаттағы ойындары әлсіреп кетті. Бәлкім, осы кубокты жеңіп алуды көздесе керек. «Атырау» финалда осымен үшінші жыл қатарынан ойнады. Бірақ кубок тағы да бұйырмады.
Жалпы, ойын сүреңсіз өтті. Екі команда да ойын бастала салысымен өте сақ қимылдап, қорғаныста жүріп алды. Өткір шабуылдарды сирек көрдік. Әсіресе бірінші таймда. Екінші кезеңде «Атырау» сапында ойнайтын Польша легионері Петр Гжельчак есеп ашты. Матчтың 83-минутында «Қайсар» сапында алаңға шыққан Игорь Зенькович араға 4 минут салып таразы басын теңестіріп кетті. Ал төреші қосқан қосымша уақыттың соңғы секундында Думан Нәрзілдаев қақпа тоғыздығын дәл көздеп, командасына жеңіс сыйлады. Осылайша араға 20 жыл салып, «Қайсар» Қазақстан кубогына қол жеткізді.
Айта кетейік, ойынның 70 минутында Асқат Тағыберген («Қайсар), 93-минутта Жак Нгвем («Атырау») алаңнан қуылды.
Дайындаған Алмас МАНАП,
«Egemen Qazaqstan»