Nur Otan партиясының «Бақытты отбасы» жобасын жүзеге асыру аясында құрылған көшпелі сараптамалық топ Шымкент қаласында жұмысын бастады.
Алқалы жиында балалардың құқықтары мен заңды мүдделерін қорғауды қамтамасыз ету жүйесін жетілдіру бойынша ұсыныстар айтылып, оны оңтайлы шешудің жолдары көрсетілді.
Республикалық кеңестің жұмыс тобы мүшелерінің отырысына қала әкімінің орынбасары Ербол Садыр, Nur Otan партиясы Шымкент қалалық филиалы төрағасының бірінші орынбасары Бахадыр Нарымбетов, қалалық басқарма басшылары, Кеңес мүшелері қатысты. Жиында денсаулық сақтау, білім беру, әлеуметтік қорғау, ішкі істер басқармаларының есептері тыңдалып, қаладағы балалардың жағдайы туралы статистикалық мәліметтер және балалар мен отбасыларды қолдау бойынша іске асырылатын жобалар талқыға түсті.
«Республикалық жұмыс тобының үшінші отырысы өтуде. Біз нақты ұсыныстарды дайындап, сараптауымыз керек. Мәселен, қалада оңалту орталықтары жетіспейді. Оңалту орталықтарында мамандар да тапшы. Алда мемлекеттік тапсырыс аясында жекеменшік орындарды ашу керек екенін бағамдап отырмыз. Жалпы, отырыста осындай нақты ұсыныстар айтылуы керек», деді Бахадыр Мәделіұлы.
Nur Otan партиясы жанындағы Балалардың құқықтарын қорғау жөніндегі республикалық кеңестің жұмыс тобы Шымкент қаласында 10 мен 11 қазан аралығында жұмыс істеді. Жұмыс тобы сапар барысында «Бақытты отбасы» партиялық жобасымен танысып, қаладағы балалардың құқықтары мен бостандықтарын қамтамасыз ететін мекемелердің қызметін бағалады.
Алқалы жиыннан соң республикалық кеңес мүшелері қала әкімдігінің «Халыққа әлеуметтік қызмет көрсететін қалалық аумақтық орталығы» мекемесі аумағында салынған балалар алаңының жұмысымен танысты. Сондай-ақ әлеуметтік қызметтер көрсететін «Самғау сенім» орталығы мен «Асыл жүрек» әлеуметтік-медициналық орталығын аралап көрді. Аталған мекемелердің тыныс-тіршілігімен танысқан елордалық жұмысшы топ «Психикалық денсаулық» орталығы жанындағы медициналық-психологиялық оңалту орталығындағы балдырғандардың жағдайына қанықты.
Қазіргі таңда 50 орындық «Самғау сенім» әлеуметтік орталығын жыл басынан бері 770 адам паналаған. Оның 297-сі – әйел болса, 652-сі – кәмелет жасына толмаған балалар. Тіпті орталықты отбасында зәбір көрген 24 ер азамат та паналапты. Жергілікті полиция өкілдері миллионды қалада тұрмыстық зорлық-зомбылыққа ұшырағандардан күндіз-түні дамылсыз қоңырау түсетінін айтады.
Айта кетерлігі, жыл басынан бері шаһарда шаңырағында шу шығарған 472 тұрғынға қатысты заң талаптарына сәйкес, әкімшілік хаттама толтырылған. Отбасында зомбылық көрген 2512 адам арнайы қорғауға алыныпты.
ШЫМКЕНТ