Тараз қаласы Полиция басқармасының Жедел басқару орталығына мүгедек балаларды оңалтумен айналысатын «Асар» қоғамдық бірлестігінің аумағына түнгі сағат екі шамасында қарақшылық шабуыл жасалғаны туралы хабарлама келіп түсті.
Бетперде киген екі белгісіз тұлға Тараздағы оңалту орталығынан екі бас жылқыны ұрлап кеткен. Жылқыларды даму мүмкіндіктері шектеулі балаларға арналған иппотерапия емдеу курстарын өткізу кезінде қоғамдық бірлестік мамандары пайдаланған.
Жамбылдық полицейлердің алдында қылмыскерлердің заттай дәлелдемелерді жойып, яғни жылқыларды етке союына немесе басқа өңірлерге сатуына жол бермеу үшін жануарларды тез табу міндеті тұрды.
– Полиция қызметкерлерінің кәсіби жедел-іздестіру шараларының нәтижесінде бір тәулік ішінде ауыр қылмыс жасаған күдіктілер анықталып, ұсталды, жылқылар оңалту орталығына қайтарылды, – деді Жамбыл облысы Полиция департаменті бастығының орынбасары, полиция полковнигі Нұржан Қалметов.
Тараз қаласының 22 және 23 жастағы екі тұрғыны кінәларын мойындап, уақытша ұстау изоляторына қамауға алынды. Аталған дерек бойынша Қылмыстық кодекстің 192-бабының 2-бөлігі бойынша сотқа дейінгі тергеу амалдары басталды (алдын ала сөз байласу арқылы жасаған қарақшылық).
«Асар» қоғамдық бірлестігі төрағасының орынбасары Әйгерім Дәулетбаева қылмысты жедел, қысқа мерзімде ашқаны үшін полиция басшылығы мен қызметкерлеріне өз алғысын білдірді. Ең бастысы, балалар соншалықты үйренген жылқылар қайтарылып, ал иппотерапия сабақтары жалғасатын болады.