Президент жанындағы Орталық коммуникациялар қызметінің алаңында Ішкі істер министрлігі Әкімшілік полиция комитетінің төрағасы Мақсат Байболов, Экология, геология және табиғи ресурстар министрлігі Орман шаруашылығы және жануарлар дүниесі комитеті төрағасының орынбасары Марлен Айнабековтің қатысуымен баспасөз мәслихаты өтті.
Шара барысында спикерлер Мемлекет басшысының «Сындарлы қоғамдық диалог – Қазақстанның тұрақтылығы мен өркендеуінің негізі» атты Қазақстан халқына Жолдауында айтылған тапсырмалары бойынша жүргізіліп жатқан жұмыстар туралы баяндады. Сонымен қатар жануарлар дүниесін қорғау саласындағы қалыптасқан жағдай, браконьерлікке қарсы күресте кешенді шаралар қабылдау қажеттігі туралы сөз қозғады.
Мемлекет басшысы браконьерлік үшін жауапкершілікті күшейту жөнінде шұғыл шаралар қабылдауды тапсырған болатын. Тапсырманы іске асыру шеңберінде Ішкі істер министрлігі Экология, геология және табиғи ресурстар министрлігімен, Бас прокуратурамен бірлесе отырып, браконьерлік үшін жазаны қатаңдатуға қатысты заңнамаға бірқатар түзету енгізген.
«Заңсыз балық аулағаны, заңсыз аң аулағаны, жануарлар мен өсімдіктер дүниесі объектілерімен заңсыз айналысқаны, ағаш кескені үшін санкция ұлғайтылды», деді Әкімшілік полиция комитетінің төрағасы Мақсат Байболов.
Бүгінгі күні ІІМ ормандарды және жануарлар дүниесін қорғау жөніндегі мемлекеттік инспекторлардың қызметтік автокөліктерін жарық және дыбыс сигналдарымен жабдықтау және бір түсті графикалық схемалар бойынша құқық қорғау және арнайы органдардың арнайы автокөліктерімен тең дәрежеде бояу құқығын беру мәселесі келісілді.
Жануарлар мен өсімдіктер дүниесін қорғау жөніндегі мемлекеттік инспекторларға қызметтік қарумен жүру құқығы берілген. Мемлекеттік инспекторлардың қызметтік қаруды қолдану тәртібі Үкіметтің 2012 жылғы 24 мамырдағы № 670 қаулысымен бекітілген.
ІІМ өкілі жануарлар мен өсімдіктер дүниесін мемлекеттік қорғау қызметкерлерінің біліктілігін арттыру үшін «браконьерлікпен күрес жөніндегі шараларды заңнамалық қамтамасыз ету» оқу бағдарламасы әзірленгенін мәлімдеді.
Министрлік өкілінің ақпаратына сүйенсек, қазан айында ел аумағында табиғат қорғау заңнамасын бұзу фактілерін анықтауға және жолын кесуге бағытталған «Браконьер» іс-шарасы өткізілген. Жалпы, іс-шара нәтижесі бойынша 2 мыңнан астам (2442) заң бұзушылық анықталған. Атап айтар болсақ, заңсыз аң аулау, ағаштар мен бұталарды заңсыз кесу, заңсыз балық аулау, биологиялық ресурстар объектілерін және олардың өнімдерін заңсыз сатып алу сынды фактілер тіркелген.
«Анықталған фактілер бойынша 192 адамға қатысты 177 сотқа дейінгі қылмыстық тергеу басталды, соның ішінде жедел-іздестіру шаралары кезінде 51 адамға қатысты 47 іс сотқа жіберілді. Құқық қорғау органдары республика бойынша 10 мыңнан астам (10746) табиғат қорғау заңнамасын бұзушылықты анықтады», дейді Марлен Айнабеков.
2018 жылы аталған заң бұзушылық фактілері бойынша 85,1 млн теңге көлемінде айыппұл салынып, 72,1 млн теңге өндірілген болатын.