Кеше теннисшілердің әлемдік рейтингі қайта жаңарды. Ерлер арасында қазақстандық спортшы Александр Бублик ТОП-50 теннисшінің қатарынан шығып қалса, қыздар арасында Елена Рыбакина сәт сайын жоғарылап келеді.
Ерлер арасындағы рейтингтік көш басында айтарлықтай өзгеріс жоқ. Испаниялық Рафаэль Надаль алдына жан салмай келеді. Екінші орында Сербияның саңлағы Новак Джокович орналасса, үздік үштікті швейцариялық Роджер Федерер түйіндеп тұр. Ал қазақстандық теннисшілер арасында еліміздің бірінші ракеткасы Александр Бублик 10 саты төмендеп, 58-орынға жайғасты. Михаил Кукушкин 67-орнын сақтап қалса, Дмитрий Попко үш саты жоғарылап 186-орынға тұрақтады.
Қыздар арасында аустралиялық Эшли Бартидің бағы жанып тұр. Жасыл құрлық өкілін чехиялық Каролина Плишкова мен жапониялық Наоми Осака өкшелеп тұр. WTA рейтингінде «ТОП-100» теннисшінің қатарына да үш отандасымыз еніп отыр. Олар – Юлия Путинцева (34-орын), Елена Рыбакина (36-орын) және Зарина Диас (78-орын).