Шымкент қаласындағы химия-биология бағытында оқытатын Назарбаев зияткерлік мектебінің оқушысы Сұңғат Әбдіразақ «Kazakhland» ойын-сауық орталығы» атты ұлттық құндылықтарды насихаттайтын жоба жасады.
Ерекше жоба мектептегі ашық есік күнінде таныстырылды. Жоба авторы жұмысты Елбасының «Ұлы даланың жеті қыры» мақаласын негізге ала отырып жасағанын, сондықтан ойын-сауық орталығы 7 секциядан тұратынын мәлімдеді.
Тарқатып айтар болсақ, «Ертегілер елі», «Археология елі», «Қазақ ән-жыры елі», «Жылқылар әлемі», «Қолөнер елі», «Ұлттық ойындар елі», «Жыл он екі ай елі». Орталыққа келген жас өскін түрлі ұлттық ойындарға қатысып, квестерді іздеп, ақыл-ойын жетілдіретін болады.
Мәселен, «Қазақ ән-жыры еліне» саяхат жасаған балалар едендегі түрлі нотаны басу арқылы түрлі күй мен әуендерді ести алады. Домбыра, қобыз, сазсырнай сынды ұлтымыздың музыкалық аспаптарының бейнесін LED экраннан тамашалап қана қоймай, одан қандай үн шығатынына да қаныға түспек.
Назарбаев зияткерлік мектебінің оқушысы Сұңғат Әбдіразақ: «Жоба шын мәнінде қолдау тауып, қалада бой көтеретін болса, онда туристер үшін таптырмас аймаққа айналар еді», дейді.
Сонымен қатар ғылыми-шығармашылық идеялар жәрмеңкесінде жас өнертапқыштардың «Bio worlds», «Рухани жаңғыру», «Robotics», «Ғылыми лаборатория», «Intellectum zone», «STEAM» және «Лайфхак» бағыттары бойынша 140-тан аса жұмысы көрермен назарына ұсынылды.
ШЫМКЕНТ