Қазіргі кезде қазақстандық қоғамда дәрігерлердің рейтингін қалай қалыптастыру қажеттігі жөнінде әртүрлі ой-пікірлер бар. Қалай дегенде де бұл мәселе денсаулық сақшыларының қызметіне тиісті баға беру арқылы анықталатыны анық. Осы орайда Ақтөбеде оның бүгінгі заманауи тәсілі жүзеге асырылып, өңірдегі барлық медициналық мекемелерге арнайы мақсаттағы QR кодтар орнатылды. Осы арқылы тұрғындар кодты смартфонмен сканерлеп, медициналық ұйымның қызмет көрсету деңгейі мен сапасын бағалай алады. Сонымен бірге бұл жөнінде өз ой-пікірін жазып немесе ауызша айтып қалдыруына да болады.
Тың бағалау тәсілі медициналық мекемелер үшін жаңа сапа стандарттарын енгізуге мүмкіндік туғызады. Сондай-ақ тұрғындардың талап-тілектері мен сұраныстарын жан-жақты зерделеуге де жол ашады. Ең бастысы, QR кодтар орнату арқылы жайлылық деңгейін көтеріп, жоғарыда айтылғандай мемлекеттік медициналық мекемелердің қызмет көрсету сапасын одан әрі жетілдіру көзделген. Бұл жөнінде «Міндетті әлеуметтік медициналық сақтандыру қоры» облыстық филиалының директоры Гүлмира Қожаниязова айтып берді.
Бүгінде қор мамандары QR код арқылы медициналық мекемелерге қалай баға беру керектігі жөнінде жан-жақты түсіндіру жұмыстарын жүргізуде.
Ақтөбе