АҚШ-тың әйгілі Forbes журналы 2010-2019 жылдар аралығында ең көп табыс тапқан спортшылардың рейтингін жариялады.
Бай-қуаттылар тізімінде Флойд Мейвезер көш бастап тұр. Соңғы 10 жыл аралығында даңқы жер жарған америкалық кәсіпқой боксшының есепшотына 915 миллион доллар аударылған екен. Әсіресе, ол филиппиндік Мэнни Пакьяо және ирландиялық Конор МакГрегормен жұдырықтасқан кездері материалдық тұрғыдан мол олжаға кенелді.
Екінші және үшінші орындарды төрткүл дүниедегі теңбіл доптың теңдессіз шеберлері өзара бөлісіп отыр. «Ювентустың» сапындағы португалиялық сұрмерген Криштиану Роналду 800 миллионды еншілесе, «Барселонада» өнер көрсететін аргентиналық саңлақ Лионель Месси 750 миллионды «қалтаға басты».
Сондай-ақ «ТОП-10» бай спортшылар қатарындаа ЛеБрон Джеймс (АҚШ, баскетбол) – 680, Роджер Федерер (Швейцария, теннис) – 640, Тайгер Вудс (АҚШ, гольф) – 615, Фил Микельсон (АҚШ, гольф) – 480, Мэнни Пакьяо (Филиппин, кәсіпқой бокс) – 435, Кевин Дюрант (АҚШ, баскетбол) – 425 және Льюис Хэмилтон (Ұлыбритания, «Формула-1») – 400 сынды саңлақтар бар.