Мемлекет басшысы Қасым-Жомарт Тоқаевтың тапсырмасына орай жаңа жылдан бастап еліміздің жоғары оқу орындарында оқитын студенттердің шәкіртақысы 25 пайызға көбейді.
Нәтижесінде, арнаулы оқу орындарында сабақты үздік оқитын студенттердің шәкіртақысы 19 272 теңгеден 24 090 теңгеге дейін өссе, басқа санаттағы білімгерлердің де 16 759 теңге стипендиясы 20 948 теңгеге дейін жоғарылады. Сондай-ақ жоғары білімді бакалавриат және магистратура жүйесі бойынша алатын студенттерге төленетін стипендия мөлшері де артады. Бұған дейін бакалавриаттағы студент 20 949 теңге шәкіртақы алса, енді бұл 26 186 теңгеге дейін өседі. Ал магистр-білімгерге 53 530 теңге төленсе, ол көбейе келе 66 913 теңгені құрамақ. Мұнан бөлек, докторантурада білімін шыңдайтын болашақ ғалымдар үшін де қуанышты жаңалық бар. Мәселен, жас ізденімпаз бұрын 81 998 теңге шәкіртақы алса, енді 102 498 теңгеге дейін ұлғаяды.
Бұл жаңалықты Талдықорған қаласында орын тепкен маңдай алды оқу орны – Жетісу мемлекеттік университетінің студент жастары қуанышпен қабылдады.
– Мен 4 жыл бакалавриатта, 2 жыл магистратурада оқыдым. Негізгі табысым стипендия еді. Студент болған күннен 20950 мың теңге стипендия алдым. Ал магистрант болғанда 53530 мың теңге алдым. Бұл қаражат менің күнделікті өмір сүруіме, коммуналдық қызметтерді төлеуіме жетіп отырды. Енді 3 жыл докторантурада оқимын. Докторанттардың стипендиясы – 82 мың. Жаңа жылдан бастап бұл 102500 теңге болды. Бұл дегеніңіз бүтін бір отбасын асырауға жететін қаражат. Сондықтан стипендияның 25 пайызға өскеніне қатты қуанып отырмын. І.Жансүгіров атындағы Жетісу мемлекеттік университетінде мен сияқты грантта оқитын сегіз жүзден астам студент бар. Олардың арасында жақсы үлгерімі үшін жоғарылатылған стипендия алатындары қаншама. Білім алған жылдарымызды мемлекетіміз стипендиямен қолдап отырса, бізге бұдан артық не керек? Сөзсіз 9 жыл бойы алған білімімді елімнің дамуына арнаймын. Қуанышты хабармен еліміздің барлық студенттерін құттықтаймын және жетісулық студенттер атынан Президентке алғыс білдіремін, – дейді 1-курс докторанты Айым Тынысханова.
Жалпы, білім сапасын арттыру мен түлектерді жұмыспен қамту мақсатында І.Жансүгіров атындағы Жетісу мемлекеттік университеті кешенді жұмыс атқарып келеді. Алматы облысы аграрлық аймақ болғандықтан, өңірге қажетті мамандықтарды зерделеп, алдағы 4 жылда қандай мамандар даярлау қажет, қандай білім бағдарламаларына басымдық беру керек екенін анықтап, сол бойынша оқу бағдарламасы жасалады екен. Сонымен қатар жыл бойы облыстағы барлық мекемелермен тығыз байланыс жасап, бос орындар анықталады. Бұл бойынша университет түлектерге мағлұмат беріп, мекеме басшыларымен кездесу ұйымдастырады.
– Өз білімгерлерін тұрақты жұмыспен қамту мақсатында Жетісу университеті жаңа бастаманы қолға алды. Бұл бастама бойынша, егер студент өндірістік тәжірибеден өтуге барған мекемеде өзінің білімі мен қабілетін дәлелдеп, жұмысқа орналасуға мүмкіндік туса, білімгерге соңғы курсты қашықтан оқуға мүмкіндік береміз. Бұл әдіс өз кезегінде, түлекті жұмыспен қамтып қана қоймай, өз кәсібі бойынша тәжірибе жинауына жол ашады. Сонымен қатар университет «Бос орындар жәрмеңкесін» өткізу, кәсіпорынның сұранысы бойынша маман даярлау, ваканттық орындар базасын құру, «Дипломмен – ауылға!» бағдарламасына қатысу арқылы түлектерді жұмыспен қамтып келеді. Мәселен, алдыңғы жылы университетті бітірген 781 түлектің 78 пайызы жұмысқа орналасса, былтырғы көрсеткіш одан да жоғары болып отыр, – дейді І.Жансүгіров атындағы Жетісу мемлекеттік университетінің ректоры Қуат Баймырзаев.
Алматы облысы