Өткенге есеп, ертеңге бағдар

Облыс бюджеті жыл басында 239,2 млрд теңге болып бекітіліп, жыл соңында 304,6 млрд теңгеге дейін ұлғайды.  Бюджет қаражатының 60 па­йы­зы әлеуметтік міндеттерді ше­шуге жұмсалды. Жалпы, жан басына шаққандағы әлеу­меттік шығыстар бойынша Сыр өңірі облыстар арасында көш бас­тап тұр.

Негізгі капиталға тартыл­ған инвес­тиция өсті, құрылыс жұ­мыс­тарының көлемі 54,3, тұрғын үйді пайдалануға беру 8,8 пайызға ұлғайды. Сондай-ақ ауыл шаруашылығының жалпы өнімі 4,3%, өңдеу өнеркәсібінің көлемі 1,3%, бөлшек тауар айналымы 1,5%-ға ұлғайды.

Жыл ішінде өңірде 17291 жұмыс орны құрылды, оның 12678-і тұрақты. 

Өткен жылдың қорытын­дысымен Қызылорда эко­номи­калық дамудың 7 көр­сеткіші бойынша 8 үздік облыстың қатарына кірді.

– Индустриялық-ин­но­ва­ция­­лық даму бағытында да нәтиже жаман емес. 2018 жыл­дың желтоқсанында қол­­данысқа берілген тампо­нажды цемент зауы­ты қазір өнімнің алты тү­рін шы­ғарады. Цемент Түр­кістан, Ақтөбе, Алматы, Жам­был облыстарына және Шымкент қаласына са­ты­лады. Сонымен қатар былтырғы шілде айынан бас­тап Өзбекстанға экспортқа жіберіледі, – деді облыс әкімі.

Өткен жылды қоры­тын­дылап, алдағы кезеңге бағдар жасайтын есепте өңір басшысы облыс эко­номикасындағы түйінді мәсе­лелерге де тоқ­талып өтті. Облыста жыл са­йын мұнай өндірісі көрсет­кіші төмендеп барады. Соңғы 7 жылда өндірілген «қара алтын» мөлшері 5 млн тоннаға азайған. Сондықтан да жа­ңа кен орындарын зерттеу жұмыстарын қолға алуы­мыз қажет. Өйткені облыс экономикасының өсімі осы жерасты байлықтарына ті­келей байланысты. Оның сыртында, осы сала­да жұ­мыс істейтін 15 мыңнан ас­там адамның жағдайын да ойлағанымыз жөн. Осыған байланысты облыстың әлеу­меттік-экономикалық да­муының 2019-2022 жылдарға арналған кешенді жоспары аясында биыл Шу – Са­рысу шөгінді бассейнінде мұнай-газдың перспективалы құрылымдарын анықтау мақсатында жер қойнауын зерт­теу жұмыстары бас­талады. Бейнеті көп бұл жұ­мыстың нәтижесі де теріс болмайды деген болжам бар. 

Облыс әкімі құрылысы ұзаққа созылған шыны зауыты туралы да айтып өтті. Өңір экономикасына үлесі мол болады деп жоспарланып отырған жоба аясында атқарылып жатқан жұмыстар жайлы «Orda Glass» ЖШС басқарма төрағасы Ержан Сағымбаев қысқаша баяндап өтті.

Осыдан 3 жыл бұ­рын облыстың ауыл шаруа­шы­лығы өнімдерін экспорттау бағытында  кешенді маркетингтік зерттеулер жүргізілген болатын. Со­ның негізінде өңірде агро­өнеркәсіптік кешеннің «Агро­картасы» жүзеге асырылуда. 

Бүгінде жиырма шақты елге экспортталатын агро­өнеркәсіптік кешен өнім­дерінің тізбесі 3-тен 19-ға дейін артты. Ауыл шаруа­шылығы өнімдерін қал­дықсыз өңдеуге жаңа тех­нологиялар тартылуда. Та­уа­р­лардың әлеуметтік ма­ңызы бар түрлеріне бағаны өсірмеуге тұрақтандыру қо­рының серіктес сауда желі­лерінің септігі тиіп отыр. 

Халықты тұрақты жұ­мыспен қамтамасыз ету, жұ­мыссыздық деңгейін тө­мендету мақсатында 2018-2020 жылдар аралығы өңірде жаппай кәсіпкерлікті дамыту жылы болып жарияланған. Жүйелі шаралар нәтижесінде жұмыс істеп тұрған кәсіп­керлік субъектілерінің саны соңғы жылы 9,3%-ға өсіп, 46297 бірлікті құрады. Кә­сіпкерлік субъектілерінен түскен са­лық түсімдерінің көлемі 11 пайызға ұлғайды.

Былтыр екінші деңгейлі банктер шағын және орта бизнес субъектілеріне жалпы сомасы 21,9 млрд теңге несие берді, оның ішінде мемлекеттік бағдарламалар шеңберінде жалпы сомасы 5,6 млрд теңгеге 166 жоба қаржыландырылды.

Облыс әкімінің есеп беру баяндамасынан кейін тұр­ғындар сауал қойды. Арал ауданы Сексеуіл кентінен келген тұрғын темір жолды жағалай тұрақтанған халыққа жаңа мектеп қажет екенін айтты. Бұл мәселе жайлы Мемлекет басшысы республикалық «Egemen Qazaqstan» газетінен оқып, тиісті орындарға тапсырма берген болатын. Облыс әкімі кент тұрғынының сауалына орай осы тапсырманың орындалу барысы жайлы айтып өтті.

– Осы мектеп жайында Мем­лекет басшысының тапсырма бергенін білесіздер. Ол орындалады. Биыл 24 қаңтарда Үкіметтің кеңей­тілген отырысынан кейін осы мәселе тағы бір пысықталды. Жоба-сметалық құжат бойынша мектептің құны 800 млн тең­гені құрап отыр. Мектеп 300 орынға арналған. Жақын арада республикалық бюджеттен қаржы алып, мектеп құры­лысын бастаймыз, – деді аймақ басшысы.

Өңір басшысына мүге­дектерге арналған такси қыз­метін ұлғайту, кейбір елді мекендерге ауыз су жеткізу, жол мен көпір салу секілді ұсыныс-тілектер айтылды. Аудандардан түскен ұсыныс-тілектер Call-орталық ар­қылы қойылды.

Облыс басшысы барлық сауалдарға жауап беріп, осы бағытта атқарылатын шаралар жайлы айтып өтті.

Қызылорда облысы