Былтыр облыстағы шағын және орта бизнес саласы бюджетке 73,8 млрд теңге салық түсірген. Бұл туралы облыстық кәсіпкерлер палатасының директоры Ғалымбек Жақсылықов бизнес-қауымдастық өкілдері алдындағы есепті кездесуінде айтты.
Кездесу алдында «Бастау» жобасы бойынша оқып, кәсіптерін ашқан іскерлер басқаратын кәсіпорындар өнімдерінен көрме көрсетілді.
Палата директоры кәсіпкерлермен кездесуде қазіргі экономикалық ахуалға, бизнестің жай-күйіне қысқаша шолу жасады.
– Біздің өңір экономикасы мұнай өндірісіне тәуелді екені белгілі. Өткен жылы мұнай өндірісі көлемінің 13%-ға төмендеуі өнеркәсіптік өнімнің 10,7%-ға азаюына алып келді. Жалпы, соңғы 7 жылда облыста мұнай өндірісі екі есеге дейін азайып, 5,5 млн тоннаға дейін төмендеген. Биыл да 1 млн тоннаға кемиді деген болжам бар. Сондықтан өңдеу өнеркәсібі бағытында облыс экономикасын әртараптарандыру қазіргі күннің басты талабына айналып отыр. Оны тек шағын және орта бизнесті дамыту арқылы қол жеткізе аламыз, - деді ол.
Биылғы 1 қаңтардағы есеп бойынша облыста 46 297 шағын және орта кәсіпкерлік субъектісі жұмыс жасауда. Өткен жылдың 9 айында сала 285,5 млрд теңгенің өнімін өндіріп, өсім – 9,9%-ке жеткен.
Соңғы 3 жылда шағын және орта бизнестің жалпы өңірлік өнімдегі үлесі 14,2%-дан 18%-ға өсіп отыр.