Түркістан облысы Келес ауданы Абай ауылының тұрғыны Мәлік Айтымбетов 70 жәшік бал арасын ұстайтын омарташы ретінде де ауылға аты мәлім азамат. Бұл іспен айналысқанына 7 жыл болған. Бүгінде отағасы 9 ұл-қыздың әкесі.
Осы ұл-қыздарының несібесі отағасының кәсібін дамыта, табысын арттыра түсуге септігін тигізіп отыр. Атаулы әлеуметтік көмек алған отбасы омарташылыққа қажетті құрал-саймандарды түгендеген. Яғни Үкіметтен 9 балаға берілген 1 млн 498 мың теңге атаулы әлеуметтік көмекті отбасы ойласа келе бал жинайтын құралдар, омарта жәшіктерін және оны көшіруге тіркеме сатып алуға жұмсапты.
«Біз ауылдағы үлкен отбасы саналамыз. Алланың берген 9 ұл-қызы бар. Солардың несібесіне былтыр атаулы әлеуметтік көмек тағайындалды. Құжатты дер кезінде дайындап, жергілікті әкімдікке өткіздік. Көп ұзамай қомақты қаржыға қол жеткізіп, өзімнің шаруашылығыма қажетті бар керек-жарақты сатып алдым. Бүгінде сол арқылы балдың 10 түрін өндіріп жатырмын» дейді Мәлік Айтымбетов.
Ал «Алтын алқа» иегері Нағима Айтымбетова жуырда бала күтімінен босап, бір мекемеге тазалаушы болып орналасыпты. Айлық жалақысы – 40 мың теңге. Омарташылықты кәсіп еткен отбасының тұңғышы Нұр-Сұлтан қаласындағы бір жоғары оқу орнында оқиды. Көп балалы отбасы енді омарташылықты кеңейтіп, бал арасы жәшіктері орналасқан тіркемелерді таситын жүк көлігін сатып алуды мақсат етіп отыр.
Түркістан облысы