Алматыда Бұқтырма көшесімен қиылысатын Құлжа тас жолында көліктерге арналған жолайырық құрылысы жалғасып жатыр. Нысан бірінші кезекте жоғарыда аталған бағыттағы кептелістің қысқаруына, экологиялық жағдайды оңалтуға, сондай-ақ қалалықтардың діттеген орнына жылдам әрі ыңғайлы жетуіне мүмкіндік береді.
Жоба бойынша жұмыс өткен жылы шілдеде басталды. Осы уақыт аралығында жолшылар құмды-қиыршық тасты қоспалардан ұзындығы 550 метр болатын жол негізі мен жабындысын төсеп, арық науаларын ұйымдастыру жұмыстарын жүргізді. Құрылыс алаңының аумағын уақытша қоршады.
Жоба Бұқтырма көшесінің бойында ұзындығы 570 метрді құрайтын үңгіртауы, Құлжа тас жолында ұзындығы 783 метр болатын эстакадасы және осы көшелер қиылысында айналма қозғалысты ұйымдастыруға арналған рампа бөлігі бар үш деңгейлі жол айырығы құрылысын қарастырады.
Жобаның бас мердігері – «Bazis Construction» ЖШС. Құны – 20,2 млрд теңге. Жолайырық Алматының солтүстік-шығыс бөлігіне түсірілетін жүктемені азайтады. Құрылыс жұмыстары нәтижесінде жолдың өткізу мүмкіндігі 15–20% артады. Келісімшартқа сәйкес жұмыстар 2022 жылғы ақпанда аяқталады деп жоспарланған.
Еске сала кетейік, Құлжа тас жолы мен Рысқұлов көшесі қиылысындағы жолайырығы 2019 жылдың желтоқсан айында пайдалануға берілді. Аталған жобаның бас мердігері «Bazis Construction» ЖШС болды. Құны 20,3 млрд теңгені құрады. Екі деңгейлі жолайырығы қауіпсіздік пен сейсмикалықтың жоғары деңгейлі стандарттарына сай екенін айта кету керек.