Жуырда Май аудандық «Шамшырақ» газетінің 80 жылдығы аталып өтті. Мерейтойға орай өткен жиынға газет ардагерлері, зиялы қауым өкілдері, аудан тұрғындары-оқырмандар қатысты. Жиналған қауымды аудан әкімі Марат Ақтаев құттықтап, басылым ұжымына шығармашылық табыс тіледі.
– Газетіміздің 2015 жылғы 27 маусым күнгі санында шыққан Іләл Ахмедидің «Аудан баспасөз қызметінің тарихынан» атты мақаласында – «Біздің Май аудандық газетіміздің алғашқы атауы «Сталин туы» болыпты. Тұңғыш редактор Б. Алтыбасаров деген азамат еді. Шағын ғана газет. Жұрт оны Алтыбасаровтың әлжуаз шағын дене бітіміне қарай «Алтыбасаровтың газеті» атап кеткен-ді» деп жазады, – дейді аудандық газеттің қазіргі редакторы Алтынбек Байғалиев.
1965 жылдың 1 мамыры күні «Маяк» аталған аудандық газеттің алғашқы саны Іләл Ахмадидің басшылығымен жарық көреді.
– Осы жылдары 19 жасымда газетке орыс тіліндегі ақпараттарды қазақшалайтын, аудармашы әрі тілші болып қызметке келдім. Осы газеттегі алғашқы еңбек жолым арқылы үлкен жолға түсіп, қоғамдық өмірге араластым, – дейді журналист Социал Әйтенұлы.
Кейінгі жылдары газет редакторлары болып Ә.Ахметов, В.Швайко, Г.Нұрмағанбетова, Қ.Темірғалинов, Г.Дүрманова, Ж.Төлеубаев, С.Жақыпов, Е.Жұмаділов, С.Мұхтаровтар қызмет атқарды. Марқұм Бақыт Әбілқасова, Нұрбибі Жанақова, Сұлубике Омышева, Орман Хамитұлы, Айман Ақтандар тілшілер легін жалғастырды.
Егемендік алған соң «Сталин», «Маяк» деген атаулармен қоштасып, «Шамшырақ» келді жарқырап. Қазақ редакциясының негізін қалаған журналистер Қайыр Жүнісқалиев, Совет Жақыпов, Серік Мұхтаров «Шамшырақтың» жарығы шалқуына үлес қосты.
Жиын барысында өткен жылдардың суреттері, сарғайған газеттер қойылған көрме ұйымдастырылып және газеттің белсенді авторлары Қайыр Жұмажанов, Ғабит Сапаров, Жаңбырбай Адамжанов, Ертісбай Жұмабеков, Берік Ескендіровтер аудандық мәслихаттың Алғыс хаттарымен марапатталды.
Аудандық «Шамшырақ» газеті де ақпарат ағыны тасқындаған уақытқа сай интернетпен жарыса ауылдағы оқырманына асығады.
Павлодар облысы,
Май ауданы