Екінші және үшінші сәуірде Солтүстік Қазақстандағы су тасқыны жағдайын мониторингтеу мақсатында қауіпті аймақтарға әуеден бақылау жүргізілді. Бортында Ішкі істер министрінің орынбасары Юрий Ильин, облыс әкімінің орынбасары Антон Федяев, ІІМ ТЖК СҚО ТЖ департаментінің бастығы, азаматтық қорғау полковнигі Рамиль Камалов бар тікұшақ Айыртау, Ғ.Мүсірепов, Шал ақын, Есіл және Қызылжар аудандары мен Петропавл қаласының аумағын аралап, ұшып өтті.
Тікұшақтағы топ Имантау, Кіші Торанғұл және Үлкен Торанғұл көлдеріндегі мұз жағдайының қаупін бағалады. Облыстың басты су артериясы – Есіл өзені мен оның – Шарық, Ақанбұрлық, Бабықбұрлық, Иманбұрлық, Жембарақ, Қамықсақты сияқты сағаларына ерекше назар аударылды. Сондай-ақ Сергеев су қоймасының бөгеті тексерілді.
Басшылар су тасқыны жағдайын мұқият қарап және жағдай шиеленіскен болса халықты қалай қорғау шараларын жоспарлады. Мұндай жоспарлар бұрыннан бар болатын. Ұшу барысында көктемгі су тасқыны қаупі мен қатерлерінен халықты қорғау бойынша жүзеге асырылатын және жоспарланған бұрынғы іс-шараларға түзетулер енгізілді.
Жалпы, биылғы ылғал қоры облыстың оңтүстік өңірінде – Айыртау, Ғ. Мүсірепов, Тимирязев аудандарында жылдағы шамадағыдай. Ал облыстың орталық, солтүстік және солтүстік-шығыс бөліктерінде қар жамылғысы түгелдей дерлік жұқарып, қауіпті жағдайды сейілтті.
Су тасқыны қаупіне қарсы жедел әрекет ету үшін құрамында 484 адам, 155 бірлік техника, 8 бірлік жүзу құралы және 72 бірлік мотопомпа бар ТЖД күштері мен құралдары бар топ дайындық сапында тұр.
Сонымен қатар су тасқыны жағдайына мониторинг жүргізу және алдын алу іс-шараларын орындау мақсатында Ғ.Мүсірепов, Уәлиханов және Айыртау аудандарына ТЖ департаменті ведомстволық бағыныстағы бөлімшелерінен 9 бірлік техника, жеке құрамынан 40 адам, 5 бірлік жүзу құралы және 7 мотопомпа күштері мен құралдарын топтастырған. Бүгінгі күнге дейін өңірдегі көктемгі қадамдар сәттілікпен басталды. Күн жарқырап, ауа райы күннен-күнге жылылыққа бет бұруда. Енді тек қарғын асау мінез танытпаса болғаны. Ар жағында егіс жұмыстарына дайындық та басталып кетеді.
Солтүстік Қазақстан облысы