Кеше Тәуелсіздік сарайында Қазақстан Республикасының Президенті Нұрсұлтан Назарбаевтың төрағалық етуімен Астана қаласын әрі қарай дамыту мәселелеріне арналған Архитектура-құрылыс кеңесінің кезекті отырысы өтті.
Кеңес отырысында сөйлеген сөзінде Мемлекет басшысы Нұрсұлтан Назарбаев Астанада пайдалануға берілген және құрылысы жүріп жатқан бірқатар еңселі ғимараттарды атап, олардың барлығы елорда тұрғындары мен қалаға келген қонақтарға қызмет көрсетіп, демалуларына арналғандығына тоқталды. Соңғы жылдары Астана қаласы барлық әлеуметтік-экономикалық көрсеткіштері жағынан еліміздің шын мәніндегі көшбасшысына айналды, деді Президент осы жайында. Қиын кезеңдердің өзінде де Астананың құрылысы тоқтаған жоқ. Күн санап ажары айшықтанып келе жатқан елордамыз өмір сүруге қолайлы, халыққа жайлы қала болып келе жатыр. Қаланың әдемі де ажарлы екендігі елордалықтарды да, қонақтарды да, тіпті алыс шетелдерден келгендерді де таң-тамаша қалдыруда.
Елбасы бұдан кейін елордада бой көтерген мәдени- сауықтыру, ойын-сауық орталықтары мен білім беру орындарын атап өтті. Мемлекет басшысының атап өткеніндей, биыл елордада Астананың жаңа университеті студенттерді қабылдайтын болады. Қала тұрғындарына емдеудің аса күрделі түрлерін шетелдерге бармай-ақ, осында емдеуге мүмкіндік жасалып отыр. Елордада бұқаралық спорт қанатын кеңге жая түсуде. Президент бұған мысал ретінде өткен жылы пайдалануға берілген жабық Орталық стадионды, басқа да спорт кешендерін келтірді.
Еңселі елордамызда мәдениет орындарының қатары көбейіп келеді, деп жалғастырды сөзін Мемлекет басшысы. Тәуелсіздік сарайы, “Қазақстан” концерт залы – бұлар әлемдегі үздік жобалар болып табылады. Бейбітшілік және келісім сарайы, Орталық цирк секілді ғимараттар бой көтерді. Азиада ойындарын өткізуге байланысты салынып жатқан Мұз айдыны мен “Хан Шатыр” орталығы биылғы жылы пайдалануға беріледі. Қаланы дамыту барысында көптеген жұмыстар жүзеге асырылды.
Президент Астана қаласын көгалдандыру мәселесіне де арнайы тоқталып өтті. Елбасының тоқталып өткеніндей, он жылдың ішінде Астананы жасыл орманды алқаппен қамту аймағы 45 мың гектарға жетті. Соның нәтижесінде желдің қуаты едәуір азайып, шаһардың ауа райы өзгере бастады. Ал 2020 жылға қарай орманды алқаптың көлемі 80 мың гектарға жететін болады. Әлемдік тәжірибеде жүзеге асырылған мұндай жұмыстар әлі кездескен жоқ. Енді Астананы ірі инновациялық орталыққа айналдыруды қамтамасыз ету қажет. Өйткені, алдағы уақытта елорда экономикалық капитал өсімінің кіндігіне айналуы тиіс.
Тұрғындарды емдейтін мекемелер бар, жастардың білім алатын оқу орындары жеткілікті, көпшіліктің спорт түрлерімен айналысуларына барлық жағдайлар жасалған, деді Нұрсұлтан Назарбаев. Қаланың инфрақұрылымы жақсарып, көлік қатынасы жолға қойылды. Астана Қазақстанның барлық аймағын дүниежүзіне жалғастыратын орталық болды. Біз астанамызды ажарландыру мақсатында елорда құрылысының негізгі шарттарының барлығын жүзеге асырдық. Ендігі жерде біз нағыз астаналық тұрғын ретінде соған сәйкес тәртібіміз бен мәдениетімізді қалыптастыруға ұмтылуымыз керек.
Мемлекет басшысы, сондай-ақ алдағы жылдары Опера және балет театры, Қазақ және Орыс драма театрлары, Тарих мұражайы мен Оқушылар сарайы салынатынынан хабардар етті. Сонымен қатар, соңғы жылдары Астана сахналарында әлемге әйгілі жұлдыздар өнер көрсете бастағанын, алдағы уақытта олардың қатары арта түсетінін атап өтті. Осының барлығы Тәуелсіз Қазақстанның астанасы – Астана қаласында еңселі мәдениет ғимараттарының көптеп бой көтеріп жатқандығының арқасы. Пайдалануға берілген спорт кешендері бос тұрмауы керек, деді Президент осы жөнінде. Оларды елорданың тұрғындары мен қонақтары пайдалануы тиіс.
Елбасы сөзінің соңында жаңа оқу жылында есігін айқара ашатын “Астананың жаңа университеті” акционерлік қоғамына тоқталып, университеттің мәні мен маңызына назар аудартты. Мемлекет басшысының атап өткеніндей, бұл жаңа университет қазақстандық жастардың әлемдік деңгейде білім алулары үшін ашылып отыр. Онда әлемге танымал ғалым-оқытушылар дәріс береді. Енді қазақстандық жастар қаржы шығарып, шетелдерге бармай-ақ осында білім алатын болады.
Өткен күздегі кеңес отырысында Президент Астана қаласының басшылығына елорданы дамытуға байланысты бірқатар тапсырмалар берген болатын. Оның орындалуы туралы Астана қаласының әкімі Иманғали Тасмағамбетов баяндап берді. Қала басшысының хабардар етуінше, қала тұрғындары санының қарқынды өсуіне байланысты елорданың Бас жоспарына түзетулер енгізілді. Жаңа алаңның ауданы мен “Хан шатыр” орталығы қалыптасты. Осы, тағы басқа өзгерістерге орай нақты кеңейтілген 30 жоба әзірленді. Өткен жылы тұрғын үй құрылыс саласын қаржыландырудың барлық көздерінен 1,250 млн. шаршы метр тұрғын үй пайдалануға берілді. Мемлекеттік бағдарлама бойынша 2010 жылдың соңына дейін 102,2 мың шаршы метр тұрғын үй тапсырылатын болады.
Қала әкімі “Балапан” бағдарламасының жүзеге асырылу барысынан да хабардар етті. Аталған бағдарлама бойынша алдағы уақытта 3 мыңдай баланы орынмен қамтамасыз ететін 14 балабақша коммуналдық меншікке қайтарылады. Құрылысы аяқталған тұрғын үй кешендерінің бірінші қабатында бүгінде жоспарланған 15 мектепке дейінгі шағын орталықтың үшеуі жұмыс істеп жатыр. Сонымен қатар жаңа 10 балабақшаның құрылысы басталды. Ал 2011 жылы – 9, 2012 жылы 5 балабақшаның құрылысын аяқтау жоспарланып отыр. Жалпы, 2012 жылдың соңына дейін барлығы 38 балабақша бүлдіршіндерге есік ашатын болады.
Астана қаласының әкімі алдағы уақытта жүзеге асырылуға тиіс жаңа жобаларға да тоқталды. Иманғали Тасмағамбетовтің атап өтуінше, “Әбу Даби Плаза”, 5 мың орындық “Хазірет Сұлтан” мешіті, 1200 орындық Классикалық опера және балет театры, Тұңғыш Президент қоры мен кітапханасының құрылысы басталады. Сондай-ақ жасыл белдеу бойынша елорда айналасына 20 мың түптен астам ағаш отырғызылып, қала ішіне 20 мың ағаш және 17 мың метрден астам тірі шарбақ отырғызу жоспарланып отыр. Бұлардан бөлек қазіргі кезде “Қазақ елі” мен “Отан қорғаушылар” монументтері алдын жаңарту жұмыстары жүргізіліп жатыр. Бұл жұмыстар Астана күні қарсаңында аяқталады.
Кеңес отырысын Мемлекет басшысы Нұрсұлтан Назарбаев қорытты. Қаралған мәселелерге байланысты тиісті мемлекеттік органдар мен ведомстволарға нақты тапсырмалар берді.
Әлисұлтан ҚҰЛАНБАЙ, “Егемен Қазақстан”.