Көпшілік көптен күткен жағымды жаңалық денсаулық сақтау басқармасынан жетті. «Тобыл қаласында 3 сәуірде госпитальға түскен әйел дертінен айықты. Ол осы айдың басында Алматыға Мысырдан ұшып келген. Қостанайға оралған әйелді оқшаулап, госпитальға жатқызған болатын. Науқас қазір құлан-таза айықты, ертең ауруханадан шығарылуы мүмкін», - деп мәлімдеді басқарманың баспасөз қызметі.
Өкінішке қарай, бүгін түске таман Жітіқара қаласында 1969 жылы туған тағы бір әйел адамнан COVID-19 індеті анықталды. Облыс әкімінің орынбасары Марат Жүндібаевтың айтуынша, қазір Жітіқарадағы аудандық аурухананың инфекция бөлімінде індетке шалдыққан 8 науқас емделіп жатыр. Ал провизорлық стационарда 24 адам медициналық бақылауда. Сондай-ақ аурухананың хирургия бөлімінде 30 адам оқшауда жатыр. Олар 28 сәуірде шығады. №1 карантиндік стационарда жеті адам жатыр, оның бесеуі медицина қызметкері. Ал №2 стационарда жатқан 16 адамның біреуі – медицина қызметкері, 11-і - полицей.
19 сәуірде Жітіқара ауруханасында карантинде жатқан 94 адамнан қан алынып, талдау қорытындысы теріс нәтиже көрсеткен. Қазір олардың бәрі үй карантиніне ауыстырылды.
Жітіқарада қазір 11 жасанды демалу құрылғысы бар. Таяуда тағы 5 құрылғы келіп түседі.
Жалпы 20 сәуірдегі жағдай бойынша облыста COVID-19 індетін жұқтырған 20 адам анықталып, 1 адам көз жұмды. Үш науқас – Тобыл қаласында госпитальда жатыр. Жітіқарада – 16, Арқалық қаласында 1 науқас тіркелген.
Қостанай облысы