Күршім ауданынан 6 жастағы бала санитариялық авиациямен облыс орталығына жеткізілді. «Екі жақты пневмония», – дейді мамандар.
– Бала Марқакөлде тұрады. Ол жақта қажетті құрал-жабдық жоқ. Баланы аудан орталығына жеткізіпті. Алайда арнайы аппарат болмаса, баладан айырылып қалуымыз мүмкін еді. Сол себепті авиацияға жүгінуге тура келді, – деді облыстық қоғамдық кеңес жанындағы денсаулық сақтау мәселелері бойынша жауапты жұмыс тобының жетекшісі Татьяна Чернышова.
Оның айтуынша, бала Өскемендегі Ана мен бала орталығына жатқызылды.
– Бала Өскеменге толық жабдықталған «ҚазАвиаҚұтқару» мекемесінің ЕС-145 Еурокоптерімен жеткізілді. Дистанциядан кеңес берген Ана мен бала орталығы мен санавиация мамандарына зор алғыс! Қазір баланың жағдайы қалыпты, – деді ол.