Тобыл өңірінің темір жүрегі саналатын Рудный қаласында орын тепкен «МедиДез» ғылыми-өндірістік бірлестігі төрт жылдан бері халықаралық стандарттағы сапалы дезинфекция және антисептик құралдарын шығарып келеді. Ел ішінде төтенше жағдай жарияланғалы компания өніміне сұраныс арта түскен. Сондықтан кәсіпорын өндіріс көлемін екі есе арттырып отыр.
Осыдан бір-екі жыл бұрын «Қазақстанның үздік тауары» байқауында топ жарып, өндірістік мақсаттағы ең үздік тауар өндіруші деген атаққа ие болған кәсіпорын бүгінде микроб жойғыш сабындар мен теріні және медициналық құрал-жабдықтарды зарарсыздандыратын химиялық өнім түрлерін көптеп шығара бастады.
– Қазір дезинфекциялық өнім шығаратын кәсіпорындардың көбейіп кеткені рас. Олар шығаратын өнімдердің пайдаланылу аясы, атауы шамалас болғанымен құрамы, сапасы, қоспалары әртүрлі. Мәселен, дәрігерлер қолдарын тәулігіне кемінде 30-40 рет зарарсыздандырады делік. Ойлап қараңызшы, егер тауар сапасыз болса, қол қандай күйге түсер еді? Сол себепті біз сапалы шикізат қолданамыз. Әрине біздің өнімді айтарлықтай арзан деп айта алмаймын. Тұтынушылармызды баға емес, сапа қызықтырады, – дейді серіктестік директоры Әлия Қайрақбаева.
Кәсіпорын өнімдері өткен жылдан бері Қырғыз елінде саудаланып келеді. Биыл Ресейге де экспорттала бастады. Компания негізінен денсаулық сақтау ұйымдары мен тамақ өнеркәсібі саласының сұранысын өтейді. Соңғы кездері елдегі ахуалға байланысты қонақүй, сұлулық салондары мен сауда орындары, төтенше жағдайда жұмыс істеп жатқан өзге де мекемелерден көп сұраныс түсе бастаған. Осыдан кейін кәсіпорын өндіріс көлемін екі есе арттырып, қосымша жұмыс орындарын ашты. Рецептурасы ерекше болғандықтан компанияның кейбір өнімін, тіпті ТМД аумағынан іздеп таба алмайсыз.
– «Талпынғанның тоқпағы тасқа да қазық кіргізер» деген – осы. Табанды ізденіс пен тынымсыз еңбек арқылы талай биікті бағындырдық. Ең бастысы, халқымыз бұл індеттен аман-есен шықсын деп тілейік!, – деді кәсіпорын басшысы.
Қостанай облысы