Британдық Matchroom Boxing промоутерлік компаниясы талантты қазақстандық боксшы Данияр Елеусінов туралы бейнесюжет жариялады. Фильмде Елеусіновтің кәсіби мансабын бастаған кезі, одан кейінгі дамуы және ринг сыртындағы сәттері көрсетілген.
Қазақстанның мақтанышына айналған Данияр Елеусінов 2016 жылы Рио Олимпиадасында топ жарғаннан кейін бағын кәсіпқой бокста сынап көруге бел буды. 2018 жылы алғашқы жекпе-жегін өткізген отандасымыз бүгінге дейін 9 рет шаршы алаңға көтеріліп, барлық қарсыласынан басым түскен. Оның бесеуін нокаутпен жеңгенін де айта кетейік.
Қандасымыз кейінгі кездесуін 2019 жылдың 20 желтоқсанында мексикалық Алан Санческе қарсы өткізіп, 5-раундта сұлатып салған-ды. Сондай-ақ Елеусінов 17 сәуірде АҚШ-тың Мэрилэнд штатындағы Оксон-Хилл қаласында әлем экс-чемпионы намибиялық боксшы Джулиус Индонгоға (23-2, 12 КО) қарсы бокстасуы керек еді. Бірақ коронавирус пандемиясына байланысты бокс кеші кейінге шегерілді.