Атырауда «MEIRIM SHUAGY» акциясы аясында 130 медицина және полиция қызметкерінің әрқайсысы 50 мың теңгеден қаржылай сыйақы алды.
Өңірлік коммуникациялар қызметінің хабарлауынша, қайырымдылық шарасына Атырау облысының құрметті азаматы Рашиля Мұрсәлиева ұйытқы болған. Акцияға облыс әкімі жанындағы Әйелдер ісі және отбасылық-демографиялық саясат жөніндегі комиссияның мүшелері мен еңбек ардагерлері, қоғам белсенділері мен Исатай, Махамбет, Қызылқоға және Индер аудандарының іскер әйелдері атсалысыпты.
– Біз «MEIRIM SHUAGY» акциясын қолға алып, қауіпті індетпен күрестің алғы шебінде жүрген медицина және полиция қызметкерлеріне қолдау көрсетуді көздедік. Акцияға үн қосқандардан он күнде 6 млн 500 мың теңге жиналды. Бұл қаржыны медицина саласының 100 қызметкеріне, сондай-ақ, 30 полиция қызметкеріне 50 мың теңгеден аудардық. Өйткені, олар қауіпті індеттің таралып кетпеуі үшін өз өмірін тәуекелге тігіп, отбасына бармай, күні-түні жұмыс істеуде. Олардың дамылсыз еңбегіне өзіміздің құрметімізді, қолдауымызды осылай білдіруді жөн көрдік, -дейді қоғам қайраткері Рашиля Мұрсәлиева.
Оның айтуынша, акция барысында «Өнерпаз» ЖШС-нің тігін цехында тегілген 1000 медициналық маска тегін таратылыпты.