Бұйырса, алдағы бірер аптада Талдықорған қаласындағы «Қаратал» шағын ауданы аумағында Студенттер үйінің есігі айқара ашылмақ. Қазір бұрынғы «сақалды» құрылысқа айналған қонақүй ғимараты толықтай қайта жаңғыртылып, керемет кампусқа айналды. Жаңа нысанның қолданысқа берілуі қалада білім алатын 288 студенттің жатақхана мәселесін бірден шешпек.
Жалпы, Алматы облысында студент жастарды жатақханамен қамту ісі Елбасының «5 әлеуметтік бастама» бағдарламасы жария болғаннан кейін қолға алынған болатын. Шын мәнісінде облыстағы оқу орындарында студенттердің жатын орны өткір мәселеге айналғаны жасырын емес еді. Мәселен, аймақтағы Жетісу университетінің күндізгі бөлімінде 3 мыңнан астам студент оқыса, оның бес жүзге жуығының ғана жатақханада тұруға мүмкіндігі бар екен. Университеттің 2 жатақханасы болғанымен, орын саны шектеулі-тін. Ал Талдықорған, Талғар қалалары мен Қаратал ауданындағы кәсіптік білім беретін арнаулы оқу орындарының білімгерлері де жатын орын тапшылығын әлі де сезінуде. Есесіне, облыс билігі де қол қусырып отырған жоқ. Жастарды тұрғын жаймен қамтуға білек сыбана кірісіп кетті. Биыл облыста жалпы саны 968 орындық 10 жатақхананың құрылысы жүріп жатыр. Оның сегізі колледж оқушыларына арналған екен. Ал Талдықорғанда ашылатын студенттер кампусы Жетісу университетінің иелігіне беріледі.
Енді Қаратал өзенінің жағалауына жақын тұрған, заманауи үлгіде жаңғырған 9 қабатты еңселі нысан тек жатын орны ғана емес, жастардың жеке қалашығына айналмақ. Мұнда 96 бөлме жасау, жабдығымен дайын тұр. Ғимарат ішінде жастар талғамынан шығатын кітапхана, клуб, кафе, шағын кино-театр, компьютер орталығы және бар. Ал кампус маңында спорт алаңдары мен серуендеуге арналған гүлзар, субұрқақ орналасқан.
– «Болашақ – жастардікі» дегенді біз тек сөз жүзінде ғана айтпауымыз керек. Жас ұрпақ мемлекеттің қамқорлығын сезінуі тиіс. Әсіресе жоғары білім алып жүрген жастардың алаңсыз оқуы үшін қолдан келген игілікті жасау біздің парызымыз. Елбасы Нұрсұлтан Назарбаев «5 әлеуметтік бастама» туралы мәселе көтергенде біздің алдымызға осындай міндет қойды. Жастардың ертең елге қалтқысыз қызмет етуі үшін, отан алдындағы парыз бен қарызды әркез салмақтай білу үшін оларға тиісті қолдау мен қамқорлық көрсетуді Президент Қасым-Жомарт Тоқаев та күн тәртібінен түсірген емес. Осы мақсат бойынша Жетісудағы студент жастардың жағдайына көңіл бөлуді үнемі жалғастырып келеміз. Соның бірі жатақхана мәселесін дер кезінде шешіп, жастарды баспанамен қамту жайы. Талдықорған қаласынан ашылатын Студенттер үйінің құрылысына баса назар аударып, барлық талапқа сай болуын үнемі назарда ұстап отырдым. Бұл жерде тек жатын орын ғана емес, жастардың өміріне қажетті заманға лайық жағдай жасауды мақсат еттік, – дейді облыс әкімі Амандық Баталов өз ойымен бөліскенде.
Жастар демекші, Жетісуда жаңа буынның жағдайына ерекше көңіл бөлініп отыр. Әсіресе жастарды жұмыспен қамту ісіне басты назарда тұр. Мәселен, «Жұмыспен қамтудың жол картасы-2020» бағдарламасы бойынша еңбек нарығындағы сұранысты реттеу үшін аймақтағы тұрғындардың тізімі жасалған болатын. Анықталған 13 334 адамның қатарында отызға дейінгі 3 228 жұмыссыз жас бар екен. Қазір бұл жастарды жұмыспен қамту бірінші кезекте жүзеге асып жатыр.