Испания чемпионатының 28 турында "Эйбардың" қақпасына гол соққан "Реалдың" ойыншысы Серхио Рамос Ла Лига тарихындағы ең мерген қорғаушылар сайысында даңқты Рональд Куманды қуып жеткені жайында біз бұған дейін жазғанбыз, - деп хабарлайды Egemen.kz.
29 турда корольдік клуб сырт алаңда "Реал Сосьедадқа" қарсы ойнады. Бәсеке барысында алаң иелері қақпасына 11 метрлік айып добы белгіленді. Нүктеге келген Серхио Рамос мүлт кеткен жоқ. Сөйтіп, ол Ла Лигадағы 68 голын соғып, әйгілі Нидерланд футболшысы Рональд Куманды басып озды. Бүгінгі таңда қорғаушылар арасындағы ең үздік көрсеткіш дәл осы футболшыға тиесілі.
Естеріңізге сала кетейік, 1989-1995 жылдар аралығында "Барселонаның" намысын қорғаған Рональд Куман 67 голының 46-сын 11 метрлік нүктеден соққан. Ал Серхио Рамос 68 голдың 13-ін ғана қақпаға сол нүктеден енгізді.