Әлемді әбігерге салып отырған коронавирус індетінің тоқтайтын түрі жоқ. Қайта күн санап күшейіп келеді. Көптің көңілінде де күмән көп. Жер шарын мазасыз күйге түсірген атышулы індеттің алдын алу мақсатында мемлекет тарапынан тиісті шаралар қабылдануда. Алайда соған қарамастан елімізде індет жұқтыру дерегі көбейіп отыр. Соңғы уақыттарда Жамбыл облысында да қауіпті індетті жұқтырған науқастар саны өскен. Сол себепті өңірде таяу уақытта шектеу шаралары қайта күшейтілетін болды.
Бүгінгі таңда Жамбыл облысында коронавирус індетін жұқтырудың 693 симптомды дерегі тіркелген. Бұл 100 мың тұрғынға шаққандағы көрсеткіш 59,9 пайызды құрайды. Сонымен қатар, өңірде індеттің 683 симптомсыз жағдайы анықталған. Бүгінгі таңда инфекциялық стационарда 272 науқас ем алуда. Дегенмен Жамбыл облысы бойынша тауарлар мен қызметтердің сапасын бақылау департаментінің басшысы Берік Жарқынбековтің айтуынша, статистика көңіл көншітпейді. Егер 15-21 маусым аралығында өңірде 317 жағдай анықталса, 22-28 маусым аралығында 473-ті құраған. Науқастардың 60 пайызы Тараз қаласында тіркелген. Тіпті департамент басшысы көрсеткіштің нашарлауына карантиндік шараларды жеңілдету және эпидемияға қарсы шаралар алгоритмдерінің сақталмауы да әсер еткенін айтты. «Эпидемиологиялық топтардың жүктемесінің ауырлығын ескере отырып, тұрғындарға медицина қызметкерлері мен эпидемиологтар жеткенге дейін барлық сақтық шараларын сақтауды ұсынамыз. Атап айтсақ, өзін өзі оқшаулау, температураны өлшеу, денсаулық жағдайын бақылау, қажет болған жағдайда аумақтық дәрігерді шақырту, жұмысқа шықпау қажет», дейді Берік Жарқынбеков. Дегенмен аталған талаптарды да толығымен орындалып отыр деуге келмейді.
Бүгінде қалыптасып отырған қиын жағдайға байланысты қайтадан нақты шаралар қабылдау қажеттігі туындауда. Мәселен, жуырда Тараз қаласының ішінде қоғамдық көліктер қайта жүре бастады. Алайда оның бекітілген тәртібі толығымен орындалып отырған жоқ. Жолаушылардың арақашықтығы сақталмауы өз алдына, көлік ішінде медициналық маска тағып отырғандардың да аз екенін байқауға болады. Мұндай жағдайлардың бәрі де індеттің одан әрі таралуына әкеліп соқтыратын көрініс. Ал бүгінде қос өкпесі қысып, дене қызуы көтеріліп, науқастанып жатқан адам көп. Бірақ қазіргі таңда өңір дәріханаларында вирусқа қарсы және дене қызуын түсіретін дәрілердің жетіспеушілігі орын алуда. Бұл да жергілікті халық үшін өзекті болып тұр. Жамбыл облысының әкімі Бердібек Сапарбаев бұл ретте аталған мәселені шешу үшін жауапты мекемелер салалық министрлікпен, «СК-Фармация» компаниясының өкілдерімен бірлесіп жұмыс істеуі керектігін айтуда. Сонымен қатар халық арасында түсіндіру жұмыстарын жүргізіп, жоқ препараттардың аналогтары туралы хабардар ету қажеттігін де ескертуде. Ал ел әбігерге түсіп, қауіпті індеттен құтылатын күнді тілеп отырғанда облыстың Мойынқұм, Сарысу және Т.Рысқұлов аудандарында медициналық маскалардың белгіленген бағадан қымбатқа сатылып жатқандығы анықталған. Бұл да қадағалаудың кемшіндігінен орын алатын жайттар.
Атышулы індетті ауыздықтау үшін жан-жақты шешімдер мен нақты іс-әрекеттердің қажет екендігін уақыттың өзі көрсетіп отыр. Мәселен, дәріханаларда қажетті дәрілердің және медициналық маскалардың жетіспеушілігі, не болмаса қымбаттығы қарапайым халық үшін кәдімгідей күрделі мәселе. Тіпті қажетті дүниелерді қолдан қымбаттату кім-кімге де жығылған үстіне жұдырық болғандай әсер етеді. Сондай-ақ науқастар үшін жатын орындар мен дәрігерлердің жетіспеушілігі сияқты мәселелер де өзі үміт пен үрейдің құшағында жүрген халық үшін оңай емес. Тіпті Бердібек Сапарбаевтың өзі де адамдардың жедел жәрдем жұмысына және ауруханаларда орындардың жоқтығына қатысты шағымдануда екенін айтқан. Сол себепті де өңірде медицина қызметкерлерінің жетіспеушілігіне байланысты резидентурада оқитын студенттерді және зейнет жасындағы дәрігерлерді жұмысқа тарту мәселелері саралануда. Облыстық денсаулық сақтау басқармасының басшысы Марат Жұманқұловтың айтуынша, бұл бағыттағы жұмыстар қазірдің өзінде жүргізіліп жатыр екен. Төсек санын көбейту бойынша да шаралар қабылданатын болады.
Бүгінде дүниеге дүрбелең тудырып, жаһанды жай отындай шарпып келе жатқан коронавирус індетінен барынша сақтану әрбір азаматтың міндеті. Бұл күнде өңірде автобус аялдамалары мен халық көп жиналатын жерлерге үнемі дезинфекциялық өңдеу жүргізіп отыру қажеттігі жиі айтылуда. Сонымен қатар технологиялық процеске қатысы жоқ мемлекеттік органдар мен мекемелер қызметкерлерінің 80 пайызын қашықтан жұмыс істеуге ауыстыру мәселесі де талқыланған. Алайда бұл шаралардың қашан іске асатынын уақыт көрсетеді. Бүгінгі таңда Жамбыл облысы бойынша 45 мониторинг тобы санитарлық-эпидемиялық талаптардың сақталуын тексеруде. Нәтижесінде, 3268 нысан тексеріліп, карантин талаптарын бұзғаны үшін 66 хаттама толтырылған. Сондай-ақ 59 іс бойынша материалдар сотқа жолданған. Жалпы, бүгінде әкімдік тарапынан тұрғындар арасында түсіндіру жұмыстары тиісті деңгейде жүргізілмейді. Десек те, әрбір тұрғын өз өміріне өзі жауапты екенін ұмытпағаны жөн. Тіпті үйінде беташар жасап, қонақ күткен талай адамдардың жасырын әрекеті әшкере болған. Сондықтан да әрбір адам өз тағдырының тізгіншісі екенін естен шығармаған дұрыс.
Жамбыл облысы