Орталық коммуникациялар қызметінде «Амбулаториялық жағдайда коронавирустық инфекциясы бар науқастарға медициналық көмек көрсету» тақырыбында баспасөз мәслихаты өтті. Шараға медицина ғылымдарының докторы, жоғары санатты дәрігер Раушан Қарабаева, Нұр-Сұлтан қаласындағы №5 емхананың бас дәрігері Алтыншаш Табулдина қатысты.
Жиын барысында Раушан Қарабаева симптомсыз коронавирусты үйде емдеуде қандай қателіктерге жол бермеу керек екенін айтып берді.
«Коронавирус инфекциясының симптомы аз немесе симптомсыз науқастар үйде емделуі керек. Әрине олар өздігінен ем қабылдап жатыр және дәрігерлер мұндай науқастардың ем-домын реттеп отыруы керек. Коронавирустың симптомы аз түрі патогенетикалық емдеуді, дәлірек айтқанда вирусқа қарсы, антибактериялық, тромбқа қарсы препараттар тағайындауды қажет етпейді. Мұндай пациенттер емдеу-сақтану режімінде ақуызы көп тамақ жеп, сұйықтықты көп ішуі керек. Оларға С, Д дәрумендері және дене қызуы көтерілген жағдайда парацетамол, ибупрофен сынды қызу түсіретін дәрілер тағайындалады», деді дәрігер.
Оның айтуынша, С дәруменінің үлкен дозасы тағайындалған жағдайда, бүйрек ауруларының, несеп-тас ауруының күшеюі мүмкін екенін есте сақтаған жөн. Егер дене қызуы 38 градустан асқанда, бұлшық ет ауырып, әлсіздік байқалса, бас ауырып, жөтел пайда болса, кеуде тұсы ауырса, дәрігерге жүгініп, өкпе қабынуының алдын алу керек. Ол үшін көкірек қуысына рентгенологиялық зерттеу немесе компьютерлік томография жүргізіледі.
«Коронавирус инфекциясындағы этиотропты (негізгі) ем – вирусқа қарсы препараттар тағайындау. Қазіргі уақытта КВИ емдеу үшін Лопинавир/Ритонавир, Гидроксихлорохин, Фавипиравир және Ремдесевир сынды дәрілік заттар жазылады. Бұл ретте аталған дәрілердің белгілі бір қауіп төндіретінін, жүрек пен бауырға уытты әсер ететінін атап өткен жөн. Осыған байланысты симптомы аз және симптомсыз науқастарға бұл дәрілерді өздігінен қабылдаудың қажеті жоқ», деді Р.Қарабаева.
Сонымен қатар ол антибиотик науқастың иммунитетін одан әрі төмендететінін тілге тиек етті.
«Қазіргі уақытта КВИ жұқтырғандардың еш қадағалаусыз антибиотик қабылдап жатқанын байқадық. Антибиотиктер ағзаның иммундық жауабын қалыптастыруға қажетті ішек микрофлорасын бұзады. Сәйкесінше, пациенттің иммунитеті одан әрі төмендей түседі. Адам бойында антибиотикті сезбейтін микроағзалар штамы пайда болады және келешектегі бактериялық инфекцияларды емдеу ісіне ықпал етеді», деді Р. Қарабаева.
Бұған қоса ол ауыр инфекцияларда ғана қолданылатын резервті антибиотиктердің де пайдаланылып жатқанына алаңдаушылық білдірді.
«Оған жол беруге болмайды, себебі пациенттің жағдайын одан әрі ауырлатуы мүмкін. Бактериялық компонент болған кезде коронавирусты антибиотиктермен тек дәрігердің нұсқауымен ғана емдеу қажет», деді Р.Қарабаева.