Жазғы демалыстың басталуымен ШҚО сыбайлас жемқорлыққа қарсы қызметіне мектеп оқушыларының ата-аналарынан, сондай-ақ педагогтардан мектепті жөндеу жұмыстарына заңсыз ақша жиналып жатқандығы туралы шағымдар келіп түсуде. Құрылыс материалдарын өз қаражатына сатып алумен қоса мұғалімдер жөндеу жұмыстарын өздері жүргізуі керек деген тапсырма түскен, - деп хабарлайды Egemen.kz.
Осыған байланысты, Шығыс Қазақстан облысының Сыбайлас жемқорлыққа қарсы қызметі мұғалімдерден заңсыз ақша жинай отырып, оларды кәсіби міндеттеріне байланысты емес жұмыс түрлеріне тарту - заң талаптарына қайшы екенін ескертеді.
"Оларға тауарлар мен қызметтерді сатып алу бойынша міндеттер жүктей отырып, мектеп директорлары ҚР "Педагог мәртебесі туралы" Заңының және ҚР "Білім туралы" Заңының талаптарын бұзатынын ескертеміз", - дейді олар.
Осыған байланысты, ақша қаражаты мәжбүрлеп жиналған немесе мектеп әкімшілігі тарапынан қысым жасалған жағдайда, ШҚО сыбайлас жемқорлыққа қарсы қызметі ата-аналарды, педагогтарды ҚР Сыбайлас жемқорлыққа қарсы күрес агенттігінің Call-орталығына 1424 нөмірі бойынша хабарласуға шақырады.