Бүкіл әлемді жайлаған індет халқымыздың басына түскен үлкен сын болды. Карантин кезінде үйде отырған, алғы шепте күресіп жүрген батырларымызбен қалауымыз бір. «Халқымыз аман болса екен» деген жалғыз тілек.
Санымыз аз Қазақ елінің тарихта көрген, басына түскен ауыртпалығы аз емес. Мына қиындықтан да аман өту – басты мақсатымыз. Халық пен билік арасындағы бірлік жарасып, «бір жағадан бас, бір жеңнен қол шығаратын» кез болып тұр. Қаншама мықты, біртуар азаматтар мен бауырларымыздан мезгілсіз айырылып отырмыз. Осының барлығы жүрекке қаяу түсіреді. Жалпы, біз қаза тапқан жанның жақындарының қасынан табылатын халықпыз ғой. Өкінішке қарай, қазір осы міндетімізді де орындай алмай отырмыз. Айналамызда жақын туыстардан, дос-жарандарымыздан айырылып отырған жайымыз бар. Билікте, бизнесте жүрген азаматтарды бар күш-жігерімізді біріктіріп, халыққа көмектесуге шақырамын. Осы қиын кезде қол созбасақ, осы кезде елдігімізді көрсетпесек, біздің құнымыз көк тиын болмақ.
Бұл нәубет әр қазақтың есінде қалары сөзсіз. Індетпен күреске бар күшін арнаған, тіпті өз өмірін берген ақ халатты абзал жандардың ерлігі халық жүрегінде мәңгі сақталады. Осы кезде арсыз іске барған алыпсатарлар мен «жығылғанға жұдырық» болып ұрлық-қарлық жасағандар да өз жазасын алары сөзсіз. Ел Президенті Қасым-Жомарт Тоқаев халыққа жолдаған телевизиялық Үндеуінде де, Үкіметтің кеңейтілген отырысында да өзекті мәселеге қатысты нақты тапсырмалар беріп, жақын арада шешуді тапсырды. Осы орайда ел басқаратын азаматтың жанынан табылып, көмегімізді аямауымыз керек. Өйткені Мемлекет басшысының да көксегені – елдің амандығы. Сабырлық, салмақтылық танытып, парасаттылықпен қолдау білдіруіміз керек. Еліміз аман, жұртымыз тыныш болсын! Жақсы күндердің алда екеніне сенімім зор. Бастысы, еңсемізді түсірмей, қолымыздан келген істен аянбайық демекпін.
Нұрлан ДУЛАТБЕКОВ,
Парламент Мәжілісінің депутаты