Жыл сайын облыстық тарихи-өлкетану музейінің қызметкерлері археологиялық қазба жұмыстарын жүргізеді. Археологиялық топ әр сапардан олжалы оралады. Мәселен, 2017 жылы Қызылқоға ауданындағы Миялы қорғандарының бірінен қоладан құйылған қазан табылды.
Қола қазанның пішіні күнделікті тұтынып жүрген бұйымнан өзгешелеу. Бір қарағанда шар тәріздес болғанмен, ернеуі кең қайырылыпты. Сыртынан тегістелгенге ұқсайды. Шеті майысып қалыпты. Төрт құлағы бар. Оның екеуі қазан ішіне үңіліп тұрған жылқы бейнесінде жасалыпты. Ал екеуінде киікке ұқсас жануар бейнеленіпті. Алайда оның бірі сынған.
Қалай дегенде, қорғаннан табылған қола қазан құнды жәдігерге айналды. Есте жоқ ескі заманның мәдениетінен сыр шертер экспонат тарихы әлі де зерттелетін болар.
Атырау облысы